Tor doiradagi muzokaralardan so‘ng Shavkat Mirziyoyev va Qosim-Jo‘mart To‘qayev muzokaralarni ikki mamlakat delegatsiyalari ishtirokida kengaytirilgan tarkibda davom ettirdi, deb xabar bermoqda Prezident matbuot xizmati.
Shavkat Mirziyoyev ko‘p qirrali va o‘zaro manfaatli O‘zbekiston—Qozog‘iston hamkorligining barcha yo‘nalishlarida salmoqli natijalarga erishilayotganini, dolzarb masalalar birgalikda hal qilinayotganini ta’kidlagan.
“Bugun ikkita tarixiy hujjatni imzolaymiz. Qardosh xalqlarimizning tub manfaatlariga javob beradigan hamda O‘zbekiston—Qozog‘iston munosabatlari tarixida yangi bosqich boshlaydigan ittifoqchilik to‘g‘risidagi shartnomani alohida qayd etmoqchiman.
Ittifoqchilik — davlatlararo hamkorlikning eng yuqori darajasi, o‘zaro ishonch belgisi. Shu bilan umumiy kelajagimizni birgalikda qurishga intilishimizni tasdiqlayapmiz.
Davlat chegaralarini demarkatsiya qilish to‘g‘risidagi shartnoma aloqalarimiz mustahkamligidan dalolat beradi, mintaqada tinchlik va xavfsizlik maqsadlariga xizmat qiladi. Chegaralarimiz doimo do‘stlik va yaxshi qo‘shnichilik hududi bo‘lgan va shunday bo‘lib qoladi”, — degan Shavkat Mirziyoyev.
Qozog‘iston yetakchisi bugun imzolanadigan shartnomalar yangi ufqlar ochishi hamda ikki mamlakatning yanada yaqinlashishga mushtarak intilishlarini to‘liq ifoda etishini ta’kidladi.
Shavkat Mirziyoyevga bunyodkorona siyosati va Qozog‘iston—O‘zbekiston munosabatlarini mustahkamlashga qo‘shayotgan ulkan hissasi uchun minnatdorlik bildirdi. Uning tashabbusi bilan amalga oshirilayotgan konstitutsiyaviy islohotlarni qo‘llab-quvvatlashini ta’kidlab, ushbu islohot O‘zbekiston taraqqiyoti uchun mustahkam poydevor bo‘lishiga ishonch bildirdi.
Ikki tomonlama hamkorlikning o‘zagi iqtisodiyot ekani, ikki mamlakatning ulkan salohiyatidan foydalanishga e’tiborni kuchaytirish lozimligi ta’kidlandi. Tranzit salohiyatidan foydalanish va uni oshirish hamkorlikning muhim sohalaridan biri sifatida qayd etildi.
Kooperatsiya loyihalarini ilgari surishga ham alohida e’tibor qaratildi. Bugun energetika, avtomobilsozlik, kimyo, elektrotexnika, qurilish, logistika va boshqa sohalarda yirik loyihalarga start berilishi mamnuniyat bilan qayd etildi.
Davlat rahbarlari energetika quvvatlarini modernizatsiya qilish va qurish, geologiya qidiruvi va tabiiy gazni chuqur qayta ishlash bo‘yicha loyihalarni ilgari surishga kelishib oldi.
Izoh (0)