«Дарё» нашри 22 декабрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Нима учун Греция Беларусьдан келадиган самолётлар учун ўз ҳаво ҳудудини ёпмоқда?
Греция Беларусдан келадиган самолётлар учун ўз ҳаво ҳудудини ёпди ва миллий авиаташувчиларига Беларусга парвозларни тақиқлади. Бу ҳақда Pentapostagma нашри Греция фуқаро авиацияси бошқармаси (HCAA) баёнотига таяниб хабар берди.
Беларусь самолётларига «Греция республикаси ҳудудига қўниш, ундан кўтарилиш ёки унинг устидан учиб ўтиш тақиқланади». Фавқулодда вазиятлар, шунингдек, гуманитар ва тиббий самолётлар учун истисно мавжуд.
Журналистларнинг тушунтиришича, Греция расмийларининг қарори Беларуснинг Украинадаги урушда иштирок этиши мумкинлиги ҳақидаги хавотирлар билан боғлиқ. Беларусь Минск Украинадаги можарода иштирок этиш ниятида эмаслигини бир неча бор таъкидлаган.
Аммо сўнгги ойларда мамлакатда Россия жангчилари ва қуроллари, жумладан, танклар ва бронетранспортёрлардан иборат минтақавий қўшинлар гуруҳи жойлаштирилди. 20 декабрь куни Москва ва Минск ягона мудофаа майдонини яратишга келишиб олди. Айни вазиятда CNN журналистлари хабар беришича сунъий йўлдошдан Россия Арктикадаги ҳарбий базаларини кучайтираётгани аниқланган.
Зеленский АҚШга ташрифдан кўзлаган мақсадларига эриша олмадими?
Украина президенти Владимир Зеленский АҚШга ташрифидан кўзланган мақсадга эриша олмади, у ҳужум операцияларини олиб бориш учун замонавийроқ қурол-яроғлар олишни режалаштирган эди. The Washington Post газетасида эълон қилинган мақолада шундай фикрлар билдирилди.
Нашр фикрича, икки давлат раҳбарининг музокаралардан кўзлаган мақсадлари турлича бўлган. Хусусан, Зеленскийнинг мақсади келаси йилда «Украинанинг йирик ҳужум операцияларини бошлаш қобилиятини ошириш учун янада кучлироқ қурол-яроғ»ни қўлга киришдан иборат бўлган. «Ҳеч бўлмаганда, қисқа муддатли истиқболда у бунга эриша олганидан дарак берувчи белгилар деярли кўринмади», — деб таъкидлайди мақола муаллифлари.
Ўз навбатида, Вашингтон маъмурияти Зеленский «дипломатия ҳақида қандай фикрда экани бўйича муҳокамалар»ни сабрсизлик билан кутган, бу ҳақда газетага Оқ уйдаги манбаси маълум қилган. «У ҳозир қайси босқичда тургани, музокаралар жараёнини тезлаштириш мумкин бўлиши учун Киев максимал даражада кучли позицияда турганига ишонч ҳосил қилиш учун унга нима кераклиги — шуларни муҳокама қилишни кўзлаган», — дея қўшиб қўйди нашр манбаси.Зеленскийнинг ўзи эса Украинага «ажойиб янгиликлар» билан қайтаётганини маълум қилди.
Шунингдек, Зеленский АҚШ Конгресси 45 миллиард долларлик ёрдам пакетини унинг таркибидан қатъий назар қўллаб-қувватлашига умид билдирган. Президент Украинанинг вазифаси — мамлакат инфратузилмасига нисбатан давом этаётган зарбалар фонида қишдан ўтиб олиш эканини айтган.
Тоғли Қорабоғда Россия тинчликпарвар кучлари ўз вазифасини бажармаганликда айбланмоқда
Арманистон бош вазири Никол Пашинян Озарбайжон томонидан Лочин йўлаги ёпиб қўйилгани сабаб Тоғли Қорабоғда оғир гуманитар вазият юзага келганини маълум қилди. Унинг сўзларига кўра, Арманистонни Қорабоғ ҳудуди билан боғлайдиган ягона йўлнинг тўсиб қўйилиши ортидан у ерда озиқ-овқат муаммоси бошланган.
«Бокунинг ҳаракатлари ноқонунийдир ва халқаро мажбуриятларни, хусусан, 2020 йил 9 ноябрдаги уч томонлама баёнот қоидаларини бузади», — деди Пашинян Арманистон Вазирлар Маҳкамаси мажлисида.
Арманистон бош вазири, шунингдек, Россия тинчликпарвар корпуси кучларини ўз мажбуриятларини бажармаётгани учун танқид қилди. «Албатта, бу Озарбайжоннинг ҳаракатлари билан боғлиқ, аммо бу масаланинг моҳиятини ўзгартирмайди. Россия тинчликпарвар кучларининг у ерда бўлишидан асосий мақсад — ноқонуний ҳаракатларга йўл қўймаслик ва Лочин йўлагини назорат остида ушлаб туриш», — деган бош вазир.
3 декабрь куни Тоғли Қорабоғ вакиллари Озарбайжон ҳарбийлари республика пойтахти Степанакертни Арманистон билан боғловчи Лочин йўлагини тўсиб қўйганини маълум қилди. Россия тинчликпарвар кучлари автомагистрални очиш учун музокараларга киришиши керак эди. 12 декабрь куни Озарбайжон фуқароларининг Озарбайжон назорати зонасидан ташқаридаги конда қазиб олинган рудани минтақадан экспорт қилишни тўхтатишни талаб қилувчи норозилиги туфайли Лочин йўлаги транспорт ҳаракати учун ёпилди.
13 декабрь куни Озарбайжон Арманистондан Тоғли Қорабоғга газ етказиб берилишини тўхтатди.
Ўзбекистонда қисқартириладиган вазирликлар учун таклифлар берила бошлади
Иқтисодчи Абдулла Абдуқодиров «Дарё» мухбирига берган интервьюсида айрим вазирлик ва идораларни қисқартириш ҳамда бирлаштириб юбориш масаласида фикр билдирди.
«Ғазначиликни Молия вазирлигидан алоҳида чиқариб, Давлат солиқ қўмитаси ва Давлат божхона қўмитаси билан бирлаштириб юбориш керак. Иқтисодиёт вазирлиги билан Молия вазирлигини ҳам бирлаштирса бўлади.
Инвестициялар ва ташқи савдо вазирлигини Инвестициялар ва саноат вазирлигига айлантириш лозим. Чунки саноат сиёсати яққол кўринмаяпти. Тоғ-кон саноатида қилинаётган катта ишларга президент ҳам эътибор берди. Нима учун бу ишларни қиляпмиз? Хўп, мисни ишлаб чиқарайлик. Кейин уни нима қиламиз, маҳсулотни қайта ишлаш масаласи ҳам бўладими ёки йўқ? Саноат сиёсати бугун биз учун жуда долзарб масала. Лекин уни инвестициядан ташқари ҳолда кўриш имконияти йўқ.
Шу билан бирга, бугун ижтимоий ҳимояга жавоб берадиган вазирлик ҳам керак. Тўғри, бундай вазирлик бир пайтлар бўлганди. Менимча, Меҳнат вазирлиги билан ижтимоий ҳимоя вазирлигини битта қилиб ташкил этиш мумкин. У камбағалликни қисқартиришга ҳам жавоб бериши керак», — дейди иқтисодчи.
Аввалроқ президент Шавкат Мирзиёев Ўзбекистонда вазирлик ва идоралар сони ҳозирги 61 тадан 28 тагача камайтирилишини, давлат хизматчилари сони ҳам босқичма-босқич 25-30 фоизга қисқаришини айтганди.
Изоҳ (0)