Грузия ҳукумати Украинага гуманитар ёрдам сифатида жўнатиш учун электр генераторларини сотиб олишни бошлади. Бу ҳақда Грузия Иқтисодиёт вазирлиги раҳбари Леван Давиташвили маълум қилди.
«Мавжуд маълумотларга кўра, харид жараёни аллақачон олиб борилмоқда, йил охиригача улар (генераторлар) Грузиядан жўнатилади», — деди Давиташвили. Унинг сўзларига кўра, генераторлар турли қувватда бўлади, шунинг учун улар турар жой бинолари учун ҳам, корпус блоклари учун ҳам «имкон қадар мослашади».
Декабрь ойи бошида Украинанинг Грузиядаги муваққат ишлар вакили Андрей Касянов Киев Тбилисидан бир неча бор ҳарбий ёки ҳам ҳарбий ҳам фуқаролик мақсадлари учун техника сўраганини, бироқ мурожаатлар эътиборга олинмаганини айтганди. Дипломатнинг қайд этишича, Украина Грузиядан электр генераторларини ҳам сўраган.
«Грузия орзуси – демократик Грузия» ҳукмрон партияси раҳбари Ираклий Кобахидзе бунга жавобан Грузия Украинага генераторлар етказиб беролмаслигини, чунки республикада бундай қурилмалар йўқлигини айтган. Бир неча кундан кейин ҳукумат бош вазир Ираклий Гарибошвилининг топшириғига биноан Иқтисодиёт вазирлиги Украинага жўнатиш учун электр генераторларини четдан сотиб олишини эълон қилди. Грузия ҳукумати бунинг учун 1,5 миллион лари (тахминан 560 минг доллар) ажратди.
Изоҳ (0)