O‘zbekistonda elektr energiyasi va tabiiy gaz tariflarini o‘zgartirish bo‘yicha ishlar ketmoqda. Bu haqda bosh vazir o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov Oliy Majlis Qonunchilik palatasi majlisida ma’lum qildi.
Jamshid Qo‘chqorovning aytishicha, energetika sohasida bir qator o‘zgarishlar qilinmoqda.
“Energetika sohasi bo‘yicha ko‘p gaplar aytildi. Bu sohada qilinayotgan ishlar haqiqatan ko‘p. Lekin natijasini birdaniga ko‘ra olmayapmiz. 2023-yilda 1,3 gigavatt quvvatga ega xususiy elektr stansiyasi ishga tushadi. 2024-yilda 4,7 gigavatt elektr stansiyasi ishga tushadi. Bundan 5 yil avval bitta ham xususiy elektr stansiyamiz yo‘q edi. 2023-yilda esa ularning ulushi 18 foizga yetadi.
Bu sohada bozor tamoyillariga asoslangan harakatlar davom etadi. Elektr energiyasi va tabiiy gaz uchun ulgurji va chakana bozorlar yaratish bo‘yicha ishlar davom ettirilmoqda. Bir so‘z bilan aytganda, faqat islohotlar bu sohaga investitsiyalar kelishiga imkon beradi. Bozor ochilsa, investitsiya hisobiga tabiiy gaz va elektr energiyasi ishlab chiqarish hajmi ko‘payadi. Bundan boshqa yo‘l yo‘q. Bunaqa katta mablag‘larni davlat qarzini ko‘paytirish hisobiga amalga oshirish imkoniyatiga ega emasmiz.
Tariflar bo‘yicha albatta ishlar olib borilyapti. Bu bo‘yicha nimadir qilish kerakligi hammaga ayon. Lekin shuni ishontirib aytamanki, ijtimoiy himoyaga muhtoj bo‘lgan aholi qatlamlari umuman bu o‘zgarishni semaydi”, – dedi vazir.
Avvalroq Jamshid Qo‘chqorov O‘zbekistonda kelgusida kutilayotgan muhim iqtisodiy o‘zgarishlar haqida gapirgandi.
Izoh (0)