Ўзбекистонда электр энергияси ва табиий газ тарифларини ўзгартириш бўйича ишлар кетмоқда. Бу ҳақда бош вазир ўринбосари — иқтисодий тараққиёт ва камбағалликни қисқартириш вазири Жамшид Қўчқоров Олий Мажлис Қонунчилик палатаси мажлисида маълум қилди.
Жамшид Қўчқоровнинг айтишича, энергетика соҳасида бир қатор ўзгаришлар қилинмоқда.
«Энергетика соҳаси бўйича кўп гаплар айтилди. Бу соҳада қилинаётган ишлар ҳақиқатан кўп. Лекин натижасини бирданига кўра олмаяпмиз. 2023 йилда 1,3 гигаватт қувватга эга хусусий электр станцияси ишга тушади. 2024 йилда 4,7 гигаватт электр станцияси ишга тушади. Бундан 5 йил аввал битта ҳам хусусий электр станциямиз йўқ эди. 2023 йилда эса уларнинг улуши 18 фоизга етади.
Бу соҳада бозор тамойилларига асосланган ҳаракатлар давом этади. Электр энергияси ва табиий газ учун улгуржи ва чакана бозорлар яратиш бўйича ишлар давом эттирилмоқда. Бир сўз билан айтганда, фақат ислоҳотлар бу соҳага инвестициялар келишига имкон беради. Бозор очилса, инвестиция ҳисобига табиий газ ва электр энергияси ишлаб чиқариш ҳажми кўпаяди. Бундан бошқа йўл йўқ. Бунақа катта маблағларни давлат қарзини кўпайтириш ҳисобига амалга ошириш имкониятига эга эмасмиз.
Тарифлар бўйича албатта ишлар олиб бориляпти. Бу бўйича нимадир қилиш кераклиги ҳаммага аён. Лекин шуни ишонтириб айтаманки, ижтимоий ҳимояга муҳтож бўлган аҳоли қатламлари умуман бу ўзгаришни семайди», – деди вазир.
Аввалроқ Жамшид Қўчқоров Ўзбекистонда келгусида кутилаётган муҳим иқтисодий ўзгаришлар ҳақида гапирганди.
Изоҳ (0)