Украина Қуролли кучлари ходими, A.Drones лойиҳаси асосчиси Юрий Касянов фронтдаги вазиятга сифат жиҳатидан таъсир кўрсатишда қандай турдаги дронлар ёрдам беришини айтди.
Касяновнинг фикрича, урушнинг кечиши дронлар туфайли ўзгарган. Авиатехника қуроллар, дори-дармонларни етказиб беришда, артиллерияни бошқаришда, разведкада, вақтни тежашда аҳамиятли. Эксперт 7 миллион долларлик Bayraktar каби қиммат ҳамда йирик дронлар бир марталик вазифаларни бажариш учун мос эмаслигини қайд этади. У фронтда арзон ва кўп сонли дронлардан фойдаланиш кераклигини таъкидлади.
«Фронтда дронлар ва коптерларнинг кескин танқислиги мавжуд. 200-300 баравар паст нархли авиатехникалар зарур, ўта қиммат ва мураккаб ускуналарни сотиб олиш урушда ғалаба қозонишимизга ёрдам бермайди», — дейди у.
Касянов ҳарбий ва ҳуқуқ-тартибот идораларини жанговар дронларга ҳаддан ташқари талаб қўйганликда айблаган. Унинг фикрича, Украинада урушда йўқолган дронларни қоплаш учун вақт йўқ, шу учун кўнгиллилар ва давлатнинг саъй-ҳаракатларига қарамай, дронлар доимо етишмайди.
«Давлат, ҳарбий идора, йирик кўнгиллилар жамғармаси бутунлай бошқача сиёсатга амал қилади. Улар энг қиммат, энг ‘самарадор’, ‘энг зўр’ дронларни реклама қилади, сотиб олади, фойдаланишга топширади. Бундай қурилмалар арзон, оддий ва ишлатиш учун қулай бўлган дронлар билан таққослаганда мураккаб тузилган. Идеал дроннинг 90 фоиз нархига 10 та қурилма сотиб олиш мумкин. Аммо битта ‘идеал’ дрон сотиб олинади», — дейди эксперт.
Касянов Украина ўзининг арзон, ишончли ва кўп миқдорда Shahed’ларини ишлаб чиқариши керак. Россия қуролли кучлари Эрон дронларидан оммавий фойдалана бошлагандан сўнг, фронтда вазиятни ўзгартириш учун бундай ускуналар жуда кўп керак бўлади.
«Бизга нисбатан арзон, тасдиқланган ва оммавий ишлаб чиқарилган дронлар керак. Разведка, ҳужум функцияларни бажарсин, Украинада ишлаб чиқарилган бўлсин», — дея хулоса қилди у.
Мавзуга доир:
Изоҳ (0)