Norvegiya qiroli Xarald V infeksiya bilan kasalxonaga yotqizildi

Norvegiya qiroli Xarald V infeksiya tashxisi bilan Oslodagi universitet kasalxonasiga yotqizildi, deb xabar bermoqda qirollik uyi sayti.

“Qirolga infeksiya tashxisi qo‘yildi, uni tomirga yuboriladigan antibiotiklar bilan davolash kerak va shuning uchun qirol kasalxonada bir necha kun qoladi. Ahvoli barqaror”, — deyiladi xabarda.

Xarald 1937-yil 21-fevralda tug‘ilgan va 1991-yilning 17-yanvaridan beri taxtda. Uning rafiqasi qirolicha Sone ham 85 yoshda. Ularning ikki farzandi bor — valiahd shahzoda Xokon (49 yosh) va malika Marta-Luiza (51 yosh).

Mahalliy Aftenposten nashrining qayd etishicha, 20-dekabr kuni 85 yoshli qirol vazirlardan birini qabul qilishi kerak edi, ammo endi buni valiahd shahzoda Xokon amalga oshiradi.

Noyabr oyida qirol shamollash tufayli bir kunlik kasallik ta’tilida bo‘lgandi, deb ta’kidladi nashr. Avgust oyida esa u yuqori harorat sabab davolanish uchun 4 kunga kasalxonada yotib chiqqan.

Shuningdek, 2020—2021-yillarda Xarald ikkita operatsiyani boshdan kechirgan.