“TurStat” portali shu yil MDH mamlakatlari poytaxtlariga o‘rnatilgan eng baland Yangi yil archalari reytingini e’lon qildi. Toshkentning 35 metrlik bosh archasi yuqori uchlikka kirdi.
Ushbu reytingda birinchi o‘rinni Turkmaniston poytaxti Ashxoboddagi archa egalladi. Balandligi 43 metr bo‘lgan sun’iy archa poytaxtdagi “Alem” madaniy-ko‘ngilochar markazi qarshisiga o‘rnatilgan. Uning rang-barang chiroqlari 2022-yil 15-dekabr kuni yoqilgan edi.
Ikkinchi o‘rinda Armaniston poytaxtidagi 37 metrlik archa joylashdi, u Yerevandagi Respublika maydoniga 5-dekabr kuni o‘rnatilgan.
O‘zbekistonning asosiy archasi esa Toshkentdagi “Yangi O‘zbekiston” bog‘idagi “Istiqlol” majmuasiga o‘rnatilgan.
Shuningdek, top o‘ntalikdan Bokudagi 34 metrlik, Dushanbedagi 30 metrlik, Moskva va Minskdagi 27 metrlik, Ostona va Bishkekdagi 25 metrlik hamda Kishinyovdagi 20 metrlik archalar o‘rin oldi.
Qayd etilishicha, Rossiyada yuqorida tilga olingan archalardan ham balandroq — 55 metrlik archa bor, u Krasnoyarskdagi Tatishev oroliga o‘rnatilgan. Biroq u mamlakatning bosh archasi hisoblanmaydi.
Reyting MDH mamlakatlarida Yangi yil archalari balandligini o‘rganib chiqish asosida tuzilgan.
Avvalroq Toshkent shahar hokimligi Yangi yil arafasida va undan keyin poytaxtning har bir tumanida archalar o‘rnatiladigan maydon va bog‘lar ro‘yxatini e’lon qilgan edi. 25-dekabrdan 5-yanvargacha bu yerda bolalar va kattalar uchun ko‘ngilochar tadbirlar bo‘lib o‘tadi.
Izoh (0)