“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 11-soni mavzusi “Tazyiq va zo‘ravonlik — nomardlik” bo‘lib, dastur mehmoni sifatida iqtisod fanlari doktori, professor Barnogul Sanakulova taklif etildi.
Iqtisodchi professor mamlakatning har sohada – moliyaviy, iqtisodiy, xavfsizlik nuqtayi nazaridan boshqa davlatlar bilan raqobatga kirisha olmasligi, dunyoda o‘z o‘rni va kelajagini yo‘qotib qo‘yishiga aynan maishiy zo‘ravonlik sabab bo‘lishi mumkinligi haqida ta’kidladi.
Nega oxirgi paytlarda bu masalaga juda qiziqib, jon kuydirib qoldim? Iqtisodchi bo‘lganligim uchun, menga muhim mavzu – kambag‘allik. Hisobotlarda kambag‘allar soni kamayyapti, aholi daromadlari oshyapti, eng boy va eng kambag‘al aholi o‘rtasida tafovut unchalik kuchli emas, degan statistikani taqdim etayotganimiz bilan, real holat tamoman boshqacha. Depressiyaga tushayotgan aholi yuqori qatlamni tashkil qilayotgani, aholining asosiy qismi faqat qorin to‘yg‘azish g‘amida yashayotganligini ko‘rib turibmiz. Kechirasiz-u, biz keyingi asrni tabiiy boyliklar emas, inson kapitali va unga kiritilgan sarmoya belgilab beradigan davrda turibmiz. Vaholanki, qazilma boyliklar qachondir tugab bitadi.Agar aholimizning asosiy qismi kambag‘allashib, qashshoqlashib boradigan bo‘lsa, biz ertaga dunyo hamjamiyatida o‘z o‘rnimizni yo‘qotib qo‘yishimiz, har qanday sohada raqobatlasha olmay qolishimiz, alaloqibat, mustaqilligimiz katta so‘roq ostida qolib ketishi mumkin.Qachonlardir boshqa mamlakatlar changalzorda baqirib yurganda, bizning ota-bobolarimiz savdo-sotiq bilan shug‘ullangan, yangiliklar yaratgan, katta yutuqlarga erishgan. Qachon hozirgi ahvolga kelib qoldik? Bu boradagi tahlillar shuni ko‘rsatdiki, hamma muammolarning negizi oilaviy, maishiy zo‘ravonlikka borib taqalar ekan, – deydi Barnogul Sanakulova.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)