«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 11-сони мавзуси «Тазйиқ ва зўравонлик — номардлик» бўлиб, дастур меҳмони сифатида иқтисод фанлари доктори, профессор Барногул Санакулова таклиф этилди.
Иқтисодчи профессор мамлакатнинг ҳар соҳада – молиявий, иқтисодий, хавфсизлик нуқтаи назаридан бошқа давлатлар билан рақобатга кириша олмаслиги, дунёда ўз ўрни ва келажагини йўқотиб қўйишига айнан маиший зўравонлик сабаб бўлиши мумкинлиги ҳақида таъкидлади.
Нега охирги пайтларда бу масалага жуда қизиқиб, жон куйдириб қолдим? Иқтисодчи бўлганлигим учун, менга муҳим мавзу – камбағаллик. Ҳисоботларда камбағаллар сони камайяпти, аҳоли даромадлари ошяпти, энг бой ва энг камбағал аҳоли ўртасида тафовут унчалик кучли эмас, деган статистикани тақдим этаётганимиз билан, реал ҳолат тамоман бошқача. Депрессияга тушаётган аҳоли юқори қатламни ташкил қилаётгани, аҳолининг асосий қисми фақат қорин тўйғазиш ғамида яшаётганлигини кўриб турибмиз. Кечирасиз-у, биз кейинги асрни табиий бойликлар эмас, инсон капитали ва унга киритилган сармоя белгилаб берадиган даврда турибмиз. Ваҳоланки, қазилма бойликлар қачондир тугаб битади.Агар аҳолимизнинг асосий қисми камбағаллашиб, қашшоқлашиб борадиган бўлса, биз эртага дунё ҳамжамиятида ўз ўрнимизни йўқотиб қўйишимиз, ҳар қандай соҳада рақобатлаша олмай қолишимиз, алалоқибат, мустақиллигимиз катта сўроқ остида қолиб кетиши мумкин.Қачонлардир бошқа мамлакатлар чангалзорда бақириб юрганда, бизнинг ота-боболаримиз савдо-сотиқ билан шуғулланган, янгиликлар яратган, катта ютуқларга эришган. Қачон ҳозирги аҳволга келиб қолдик? Бу борадаги таҳлиллар шуни кўрсатдики, ҳамма муаммоларнинг негизи оилавий, маиший зўравонликка бориб тақалар экан, – дейди Барногул Санакулова.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)