UzAuto Motors kompaniyasi Chevrolet Lacetti, Cobalt, Damas va Labo avtomobillariga shartnomalar qabul qilishni vaqtincha to‘xtatishini e’lon qildi. Bu haqda kompaniyaning xaridorlarga rasmiy murojaatida aytib o‘tildi.
“O‘zbekistonda avtomobillarga bo‘lgan talabning anomal o‘sishi va global muammolar kuchayganini hisobga olib, kompaniya bunday sharoitda boshqa avtomobil ishlab chiqaruvchilar tomonidan qo‘llanilgan yo‘ldan borishni to‘g‘ri deb hisoblaydi va Chevrolet Lacetti, Cobalt, Damas va Labo avtomobillariga shartnomalar qabul qilishni vaqtincha to‘xtatadi. Bu o‘z navbatida barcha sa’y-harakatni avval tuzilgan shartnomalar bo‘yicha avtomobil ishlab chiqarishga yo‘naltiradi”, — deyiladi murojaatda.
Kompaniya o‘z mijozlaridan vaziyatni tushunishni so‘rab qolgan. Ta’kidlanishicha, hozirgi sharoitda UzAuto Motors’ning asosiy maqsadi avval tuzilgan shartnomalar bo‘yicha o‘z majburiyatlarini bajarishdan iborat.
“Sizning qo‘llab-quvvatlashingiz bilan tez orada yuzaga kelgan vaziyatni yengillashtirishimizga hamda ushbu avtomobil modellari uchun shartnomalar qayta yo‘lga qo‘yilishiga ishonamiz”, — deya o‘z murojaatiga xulosa yasagan kompaniya.
Damas va Labo’ga shartnomalar tuzish 13-dekabrdan boshlab to‘xtatilgani, undan avvalroq Lacetti va Cobalt kontraktatsiyasi ham to‘xtatilgani ma’lum bo‘lgan, biroq bu bo‘yicha rasmiy bayonot berilmagan edi.
Izoh (0)