Yevroittifoq mamlakatlari hukumatlari Ukrainadagi urush tufayli, Rossiyaga qarshi sanksiyalarning to‘qqizinchi paketini kelishib oldi. Bu haqda yevropalik diplomatlarga tayanib, Reuters va AFP xabar bermoqda.
Reuters manbalariga ko‘ra, rasmiy yozma jarayon 16-dekabr kuni tushgacha yakunlanadi. Agentlik manbalari boshqa tafsilotlarni taqdim etmadi.
Yangi cheklovlar bo‘yicha kelishib olingani haqida rasman e’lon qilinganicha yo‘q.
Avvalroq Reuters’ning diplomatik manbalari Yevroittifoq mamlakatlari sanksiyalarning to‘qqizinchi paketi bo‘yicha kelishuvga erisha olmaganini aytgandi. Agentlik ma’lumotlariga ko‘ra, muzokaralar ishtirokchilari kelishuvga yaqinlashgan, biroq ular ba’zi mamlakatlar, masalan, Polshaning noroziliklariga yechim topa olmagan.
Kelishmovchilikni keltirib chiqargan masalalardan biri — Yevroittifoq sanksiya ro‘yxatlariga tushgan rossiyalik biznesmenlarga tegishli kompaniyalar uchun ham Yevropa portlari orqali Rossiya o‘g‘itlarini eksport qilishga cheklovlarni kamaytirishi kerak yoki kerak emasligi bo‘ldi.
Ba’zi Yevropa mamlakatlari o‘g‘itlarga nisbatan cheklovlar rivojlanayotgan mamlakatlar oziq-ovqat xavfsizligiga tahdid soladi, deb hisobladi. Boshqalari esa sanksiyalarning yumshatilishi Rossiyada o‘g‘it ishlab chiqaruvchi korxonalar egalariga avvalroq kiritilgan cheklovlarni chetlab o‘tish imkonini berishini aytdi.
“Istisnolar hali ham bor. Lekin ularga aniqlik kiritildiki, Yevroittifoqqa a’zo har bitta davlat o‘zining milliy xavfsizlik manfaatlarini e’tiborga olishi mumkin bo‘ldi”, — dedi “Radio Svoboda” jurnalisti Rikard Yozvyak.
Yevrokomissiya yangi sanksiyalar haida dekabr boshida e’lon qilgan edi. Cheklovlar ro‘yxatiga ba’zi toifadagi tovarlar, shu jumladan, qo‘sh maqsadli va elektronika tovarlari eksporti uchun cheklovlar, Rossiya va Rossiyaga sotishi mumkin bo‘lgan uchinchi mamlakatlarga dronlar ishlab chiqarish uchun detallar eksportiga taqiq kirishi xabar berilgandi.
Bundan tashqari, Rossiyaning to‘rtta telekanalini uzatishning taqiqlanishi, Rossiyaning uchta banki, shuningdek, kompaniyalar va jismoniy shaxslar — hukumat xodimlari, harbiylar va Davlat dumasi deputatlariga nisbatan sanksiyalar haqida ma’lum qilingandi.
Izoh (0)