“Bizda fuqarolarning e’tiqodiga hech qanday taqiq yo‘q”, – dedi Ichki ishlar vazirligi matbuot kotibi Shohrux G‘iyosov 15-dekabr kuni AOKAda bo‘lib o‘tgan matbuot anjumanida.
Tadbirda jurnalistlardan biri IIV mas’ulidan soqol bo‘yicha reydlar to‘g‘risida so‘ragan. Uning aytishicha, ijtimoiy tarmoqlarda IIV xodimlari fuqarolarni majburlab soqolini oldirish holatlari ko‘p muhokama qilinadi. Xususan, Toshkent shahridagi “Malika” bozorida ham shunday voqea sodir etilgani misol keltirildi.
“Erkaklarga soqol qo‘yish bo‘yicha biror cheklov yoki taqiq bormi”, – deya so‘radi jurnalist.
Shohrux G‘iyosovning aytishicha, soqolga taqiqi yo‘q va unday reydlar IIV xodimlari tomonidan umuman o‘tkazilmagan.
“Bizda fuqarolarning e’tiqodiga hech qanday taqiq yo‘q. “Malika” bozorida yuz bergan holat o‘tgan yili yozda bo‘lgandi. U yerdan jinoyatga aloqador shaxslar olib chiqilgan. Ya’ni do‘konda jinoyat sodir etilgan, aka-ukalar bir birini pichoqlagan. Shu jinoyatga aloqador bo‘lgan shaxslar olib chiqilgan. Biz o‘sha vaqtda munosabat bildirganmiz.
Agar fuqarolarda konstitutsion huquqi buzilayotgani to‘g‘risida e’tiroz bo‘lsa, albatta, shikoyat qilish huquqi bor. Siz aytgan holatlar biror marta bo‘lgani yo‘q. Hech qanday taqiq yo‘q”, – dedi IIV matbuot kotibi.
“Malika” bozorida nima bo‘lgan edi?
Shayxontohur tumanidagi “Malika” savdo maskanida o‘nlab erkaklar IIB binosiga olib kelinib, ularning soqoli majburan oldirilgani haqida xabarlar tarqalgandi. Toshkent shahar IIBB bu xabarlarga javoban, fuqarolar soqolini hech kim majburan qirmaganini bildirgan.
“Shayxontohur tumanidagi “Malika” deb nomlanmish savdo maskanida bo‘lib o‘tgan hodisaga to‘xtalsak. Darhaqiqat, u yerda ishlaydigan ba’zi shaxslar bo‘yicha o‘g‘rilik, o‘g‘irlangan qo‘l telefonlarini sotib olish va sotish faktlari asosida qo‘zg‘atilgan jinoyat ishi doirasida tezkor tadbirlar o‘tkazilgan.
Afsuski, bu kabi holatlar hanuz ro‘y berib turadi va ushbu savdo maskanida rasman va norasman ishlaydigan alohida shaxslar qonunbuzarliklarga aralashib qolishgan. Suhbatga taklif etilganlar soqoli bor yoki yo‘qlarga ajratilmagan, ammo ta’kidlash joizki, soqollilar u yerda ko‘pchilikni tashkil etadi.
Alohida fuqarolarga tashqi ko‘rinishlarini biometrik pasportdalaridagi rasmlariga muvofiqlashtirish tavsiya etilgan. Deyarli barcha ushbu iltimosni to‘g‘ri tushundi. Ko‘plar soqol qo‘yib yurish ular uchun muhim emasligini, balki vaqt yo‘qligi, modaga taqlid qilish va boshqa sabablarga ko‘ra soqollarini olmaganlarini ma’lum qilishdi”, – deya ma’lum qilgan IIBB.
Munosabatda shuningdek, yuqoridagi holatga diniy mazmunning hech qanday aloqasi yo‘qligi keltirilgan.
“Bu vaziyatda dindorlarning hissiyotlari bilan o‘ynashish, mazkur mavzuni bo‘rttirish noo‘rindir”, – deya tushuntirgan IIBB.
Izoh (1)
O‘ziz ishonasizmi shunga ???