Бухоро, Наманган ва Хоразм вилоятларида умумий қуввати 500 МВт бўлган 3 та қуёш фотоэлектр станциясини қуриш ва улардан фойдаланиш бўйича ўтказилган тендер танловларида ғолиб инвесторлар аниқланганди. Энергетика вазирлиги Наманган вилояти учун берилган таклиф қайта кўриб чиқилишини маълум қилди.
Танлов натижаларига кўра БААнинг Masdar компанияси Бухоро вилоятида 250 МВт қувватга эга лойиҳани қуриш ва унда ишлаб чиқарилган электр энергиясининг бир киловатт-соати учун 3,044 АҚШ сенти миқдорида таклифи билан ғолиб бўлганди. Франциянинг Voltalia компанияси компанияси Хоразм вилоятида 100 МВт қувватга эгалойиҳа учун ишлаб чиқарилган бир киловатт-соат электр энергиясини 2,888 АҚШ сентида етказиб бериш таклифи билан ғолиб деб топилган.
Хитойнинг GD Power — Powerchina консорсиуми компанияси эса Наманган вилоятида 150 МВт қувватга эга лойиҳа учун унда ишлаб чиқарилган бир киловатт-соат электр энергиясини 4,828 АҚШ сентида етказиб бериш таклифи билан ғолиб деб топилганди. Энергетика вазирлиги ушбу лойиҳа бўйича тарифни оптималлаштириш юзасидан қўшимча музокаралар ўтказилишини маълум қилганди.
Иқтисодчи Отабек Бакиров қуёш станцияларидан 4,828 сентдан электр жуда қимматлигини айтди.
«Кўриб турибсизки, янги лойиҳалар бўйича нархлар росмана қимматлаган. Бунга тендер шакли ва дизайни ҳам таъсир кўрсатган кўринади. Чунки биринчи марта 3 та станция қуриш бўйича 3 та лот тендери бир вақтда олиб борилди. Бу унча тўғри бўлмаган тактика, чунки қуёш станцияси қуриш бўйича бусиз ҳам Ўзбекистонда 3-4 компания ишлаяпти холос. Улар бир-бирига рақобат қилмаслиги учун биттадан лотни белгилаб олган бўлишлари эҳтимоли ҳам йўқ эмас. Намангандаги станция водийдаги биринчи қуёш станцияси бўлади, энергия таъминотидаги энг катта дисбалансга эга ҳудудда починни бундай бошламаслик керак», — деган у.
Энергетика вазирлиги Наманган вилоятидаги қуёш фотоэлектр станцияси учун берилган таклиф қайта кўриб чиқилишини эълон қилди.
«Ҳақиқатдан ҳам, Наманган вилоятида 150 МВт қувватли лойиҳа учун GD Power — Powerchina консорсиуми (Хитой) компанияси томонидан ишлаб чиқарилган бир киловатт-соат электр энергиясини 4,828 АҚШ сентида етказиб бериш таклифи қиммат ҳисобланади. Шу муносабат билан Энергетика вазирлиги ушбу таклифни жуда қиммат деб ҳисоблайди ва ушбу лойиҳа бўйича тарифни оптималлаштириш юзасидан қўшимча музокаралар ўтказилишини маълум қилади», — дейилади вазирлик хабарида.
Таъкидланишича, мазкур лойиҳани амалга оширишда электр энергияси тарифини камайтириш чоралари кўрилади ва станциянинг қурилишида хавфсизлик томонларига алоҳида эътибор берилади.
Изоҳ (0)