Қашқадарё вилояти ҳокими Муроджон Азимовнинг талаба ёшлар билан учрашувида ҳокимга танқидчи блогерларга қарши жамоа тузишни ва уларга муносиб жавоб қайтаришни таклиф қилган талаба қиз фикри нотўғри талқин қилинаётганини айтмоқда. Бу ҳақда у «Дарё» мухбири билан мулоқотида маълум қилди.
Ҳокимга кўнгилли ёшлардан иборат блогерлар жамоасини тузиш таклифини мен бергандим. Бу фикрларим жамоатчилик муҳокамасига сабаб бўлаётганини кўриб, кузатиб турибман. Кўпчиликнинг фикрини ўқиб чиқдим. Ўша тадбирда вилоят ҳокимининг кўп вақтини олмаслик учун фикримни охиригача баён қилолмадим. Бу эса гапларим нотўғри талқин қилинишига сабаб бўлмоқда, — дейди талаба қиз Ситора Жалилова.
Суҳбатдошнинг айтишича, у блогерлар жамоасини тузиш таклифини берганда кимнидир оқлаш ёки қоралашни назарда тутмаган.
Мен бу гапларим — таклифим билан айнан кимнидир қоралаш ёки оқлашни айтмадим. Баъзи бир ҳолатларда воқеани бўрттириб гапириб, вилоятимиз шаънига ёмон гаплар айтаётган, бунга ҳуқуқи бор ёки йўқлигини билмай ҳолатга нотўғри ёндашаётган блогерлар воқеага ижобий ёндашиш ҳам керак деган маънода гапирдим, — дейди у.
Суҳбатдош «Дарё» мухбирининг «Қўштирноқ ичидаги айрим блогерлар деганда айнан кимларни назарда тутгансиз?», «Танқидий масалаларга нотўғри ёндашган блогерларнинг бирортаси исмини айтоласизми? », деган саволларини очиқ қолдирди.
Талаба қиз блогерлар жамоасини тузишдан мақсади жамоа аъзолари чекка-чекка қишлоқларга бориб, туманларга тарқалган ҳолда камчиликларни ўрганиши ва уларга ечим топилишига кўмаклашиши назарда тутганини айтмоқда.
Мен блогерлар жамоаси чекка-чекка ҳудудлардаги муаммоларни ўрганиб, масъулларга киритган ҳолда уларнинг ечим топилишида кўмаклашади деган мазмунда бу таклифни бергандим. Мен ҳам оддий қишлоқ қизиман. Менинг қишлоғимда камчилик йўқ дейсизми? Бизга ўхшаган ёшлар бирлашсак, камчиликларни ижобий ҳал этишда ўз ҳиссамизни қўшсак нимаси ёмон?, — дейди Ситора Жалилова.
Ситоранинг қўшимча қилишича, у ўз билими билан ОТМ талабаси бўлган.
Олийгоҳни тамомласам, билимим билан ишга кироламан. Ёш қиз олдинга бир қадам ташлаб юраман деса, унга бирдан тош отиш яхши эмас. Ҳокимимиз мендек оддий бир талаба қизга имкон бериб кўряпти. Бу ишончни муносиб оқлайман. Илтимос, бир-биримизни ҳурмат қилайлик, — дейди суҳбатдош.
Гаплари жамоатчилик муҳокамасига сабаб бўлаётган қиз жамоатчиликдан фикрини нотўғри тушунмасликни сўрамоқда.
Нимаки гапирган бўлсам, яхши ният билан гапирдим. Ҳали ёшман тажрибам камдир, аммо ҳаракат қилиб кўришга ҳаққим бор-ку, — дейди у.
Эслатиб ўтамиз, Ситора Жалилованинг ҳоким билан мулоқотида илгари сурган ташаббуси жамоатчилик эътирози-ю, муҳокамасига сабаб бўлгач, вилоят ҳокимлиги ахборот хизмати раҳбари Аҳрор Содиқов қизнинг гаплари оддий таклиф эканини, қолаверса талаба ишга қабул қилинган тақдирда ҳам лавозими доирасидаги ишни олиб боришини айтиб, «Масалан, ҳокимликнинг ижтимоий бўлимига ишга ўтса, таълим ва соғлиқни сақлаш соҳасида, туризм бўлимига ишга ўтса, туризм соҳасини ривожлантириш борасида иш олиб боради», — деганди.
Изоҳ (0)