Futbol bo‘yicha JCH—2022 yarim finali Fransiya va Marokash o‘rtasidagi o‘yindan so‘ng (2:0) yuzaga kelgan tartibsizliklar oqibatida 14 yoshli bola hayotdan ko‘z yumgan.
Le Figaro nashrining xabariga ko‘ra, yarim finaldan so‘ng Monpelyeda yuzaga kelgan tartibsizliklar vaqtida 14 yoshli bola avtomobil tagida qolgan. Shundan so‘ng u darhol kasalxonaga yetkazilgan, biroq olgan jarohatlari tufayli vafot etgan.
Voqea aks etgan videolar ijtimoiy tarmoqlarda tarqaldi. Unda bir guruh yoshlar mashinani o‘rab olgani ko‘rsatilgan. Ulardan biri mashina oynasiga osilgan Fransiya bayrog‘ini yirtib tashlagan, shundan so‘ng haydovchi gaz pedalini keskin bosgan. Natijada 14 yoshli bola mashina g‘ildiraklari ostida qolgan.
Haydovchi voqea joyidan qochib ketgan. Keyin esa mashina uncha uzoq bo‘lmagan joydan topilgan. Rasmiylarning ma’lumotiga ko‘ra, tergov tez sur’atlarda davom etmoqda.
Fransiya milliy assambleyasi deputati Natali Oziol marhumning 14 yoshda bo‘lganini tasdiqladi. “Cheksiz qayg‘u. Sport musobaqasi haqiqiy fojia bilan yakunlandi. Oila a’zolariga hamdardlik bildiramiz va ularga har qanday yordam berishga tayyormiz”, — deydi deputat.
Izoh (0)