Футбол бўйича ЖЧ—2022 ярим финали Франция ва Марокаш ўртасидаги ўйиндан сўнг (2:0) юзага келган тартибсизликлар оқибатида 14 ёшли бола ҳаётдан кўз юмган.
Le Figaro нашрининг хабарига кўра, ярим финалдан сўнг Монпельеда юзага келган тартибсизликлар вақтида 14 ёшли бола автомобиль тагида қолган. Шундан сўнг у дарҳол касалхонага етказилган, бироқ олган жароҳатлари туфайли вафот этган.
Воқеа акс этган видеолар ижтимоий тармоқларда тарқалди. Унда бир гуруҳ ёшлар машинани ўраб олгани кўрсатилган. Улардан бири машина ойнасига осилган Франция байроғини йиртиб ташлаган, шундан сўнг ҳайдовчи газ педалини кескин босган. Натижада 14 ёшли бола машина ғилдираклари остида қолган.
Ҳайдовчи воқеа жойидан қочиб кетган. Кейин эса машина унча узоқ бўлмаган жойдан топилган. Расмийларнинг маълумотига кўра, тергов тез суръатларда давом этмоқда.
Франция миллий ассамблеяси депутати Натали Озиол марҳумнинг 14 ёшда бўлганини тасдиқлади. «Чексиз қайғу. Спорт мусобақаси ҳақиқий фожиа билан якунланди. Оила аъзоларига ҳамдардлик билдирамиз ва уларга ҳар қандай ёрдам беришга тайёрмиз», — дейди депутат.
Изоҳ (0)