Futbol bo‘yicha JCH—2022 yarim finali doirasida kechgan Fransiya va Marokash terma jamoalari o‘rtasidagi o‘yindan (2:0) keyin qator shaharlarda tartibsizliklar yuzaga keldi.
Fransiyaning Parij, Lans, Nitssa, Monpelye va boshqa shaharlarida tartibsizliklar kelib chiqqan. Ularning aksariyatiga politsiya aralashgan. France24 xabariga ko‘ra, 170 dan ziyod kishi hibsga olingan, ularning 100 dan ziyodi Parijda ushlangan.
Le Figaro’ga ko‘ra, Parijda 101 kishi hibsga olingan. Qayd etilishicha, ultrao‘nglarga yaqin bo‘lgan guruh ham qo‘lga olingan. Ular 40 kishidan iborat bo‘lib, qurollangan bo‘lgan va Yelisey maydoniga kirishga uringan.
Parijda tartibsizliklarni jilovlash uchun 2,2 mingdan ortiq politsiya va jandarm jalb qilingan. Fransiya bo‘ylab umumiy miqdorda 10 mingga yaqin politsiyachi safarbar etilgan.
Belgiyaning Bryussel shahrida ham marokashliklar muxlislar tartibsizliklar keltirib chiqargan. Janubiy vokzalda to‘plangan ishqibozlar politsiya tomon fayerlar va boshqa buyumlarni uloqtirgan, chiqindi idishlari, turli narsalar yoqib yuborilgan. Politsiya esa tartibsizliklarni bostirish uchun suv otuvchi moslama va ko‘zdan yosh oqizuvchi gazdan foydalangan.
Avvalroq Niderlandiyaning qator shaharlarida tartibsizliklarni oldini olish maqsadida Marokash ishtirokidagi o‘yinlarni odam to‘planadigan katta maydonlarda namoyish qilish taqiqlangani haqida xabar berilgandi.
Mavzuga doir: Parijda Marokash va Fransiya terma jamoasi muxlislari ishtirokida ommaviy tartibsizliklar yuzaga keldi (video)
Izoh (0)