Ilon Mask dunyoning eng boy odamlari reytingida yetakchilikni boy berdi — Forbes

Forbes Real Time milliarderlari reytingida Ilon Mask dunyoning eng badavlat odami sifatida birinchi o‘rinni Bernard Arno va uning oilasiga boy berdi.

Tadbirkor Ilon Maskning boyligi 176,8 milliard dollarga, Louis Vuitton Moet Hennessy (LVMH) prezidenti Arno va uning oilasining boyligi esa 188,6 milliard dollarga baholangan.

Forbes ma’lumotlariga ko‘ra, kun davomida Ilon Maskning boyligi 4,5 milliard dollarga (-2,49 foizga) qisqargan, Bernard Arno esa 2,7 milliard dollarga (+1,44 foiz) “boyib ketgan”.

Shu bilan birga, Bloomberg milliarderlar indeksida ham 171 milliard dollar boyligi bilan Bernard Arno birinchi, Ilon Mask esa 164 milliard dollar boyligi bilan ikkinchi o‘rinni egallab turibdi.

Oxirgi marta Ilon Mask Forbes reytingida birinchi o‘rindan 7-dekabr kuni tushib ketgan, biroq bu holat atigi yarim soat davom etgan edi.

Ma’lumotlarga ko‘ra, o‘tgan haftada LVMHda kadrlar almashinuvi bo‘lib o‘tgan.

Agache (Christian Dior brendi aksiyalariga egalik qiluvchi va Bernard Arnault tomonidan boshqariladigan xolding kompaniyasi) mas’uliyati cheklangan jamiyatga aylantirilishi fonida LVMH prezidentining o‘g‘li Antuan Arno Christian Dior bosh direktori etib tayinlangan.

Avvalroq Pavel Durov BAAdagi eng boy odam deb tan olingani haqida xabar berilgandi.