«2023 йилдан фуқароларни Япония ва Исроилга ишлаш учун юбориш йўлга қўйилади» — Афзал Эрматов

2023 йилдан бошлаб ўзбекистонликларга Япония ва Исроилда ишлаш имконияти кенгаяди. Бу ҳақда АОКАда бўлиб ўтган матбуот анжуманида Ташқи меҳнат миграцияси агентлиги бошлиғи Афзал Эрматов маълум қилди.

Афзал Эрматовнинг таъкидлашича, мазкур масалада давлатлараро битимлар тузилган.

Янги йилдан бошлаб Япония ва Исроилга қарияларни парвариш қилиш ва тиббиёт соҳаларида фуқароларни ишга жўнатиш йўлга қўйилади. Бу бўйича икки давлат ўртасидаги битимлар имзоланган, – деди у.

Маълум қилинишича, айни пайтда энг кўп – 1,5 миллион ўзбекистонлик муҳожир Россияда ишлаётган бўлиб, улар асосан қурилиш ва юқори малака талаб этилмайдиган соҳаларда меҳнат қилади. Кўплаб давлатлар эса ишга қабулда махсус малака талаб қилмоқда.

Хорижий иш берувчи малака ва қайта тайёрлов дипломи талаб қилмоқда. Фуқаролар яқин-яқингача Германия ёки Англияга ишлаш учун юборилмаган. Европа давлатларида B1 сертификати талаб этилади. Фақатгина мавсумий ишлардагина тил билиш талаб қилинмайди. Яқинда Япония ва Кореяга бориб келдик. У ерларда ҳам ишга қабул қилиш учун тилни камида минимал даражада билиш талаб этиляпти. Шу кунларгача Россия бор-ку, кетяпти-ку, деб чегараланиб қолгандик. Лекин энди янги давлатларга йўл очяпмиз. Масалан, Болгария, Руминияга. Хусусий бандлик агентликлари ҳам тўхтаб қолгани йўқ, изланмоқда, – дейди Меҳнат вазирлиги бошқарма бошлиғи Зоҳид Асқаров.

Зоҳид Асқаровнинг қўшимча қилишича, авваллари Европа давлатларига ишчи виза олиш қийин бўлган. Ҳозир уларда ишчиларга бўлган талаб ошган ва сайёҳлик ҳамда ишчи визалар олиш учун имконият кўп.

Ҳаммаси бизникилар бориб ўзига берилган мажбуриятларни бажаришига боғлиқ. Улар эртага нолегал ҳолатга чиқиб кетса, меҳнат шартномасини бузиб иш жойини тарк этса, келгусида борадиган бошқа фуқароларга салбий таъсир кўрсатиши мумкин. Уларнинг ҳам йўли тўсилади.

Эсласангиз, ўтган йили Кореянинг мавсумий ишини биринчи марта очган эдик. Лекин биз юборган 420 нафар муҳожирдан 307 нафари иш жойини ташлаб қочиб кетган. Шунинг учун Корея биздан ишчилар олишни тўхтатган. Яъни шунақа ҳолатлар ҳам бор. Бизни фуқаролар ўз мажбуриятини тўлиқ бажарса, ўз салоҳиятини кўрсаца, бу имкониятлар кундан кун кенгайиб боради, – деди у.

Аввалроқ 2022 йилнинг ўтган даврида 35 мингга яқин ўзбекистонлик Россия, Қозоғистон, Жанубий Корея, Германия, Англия ва бошқа Европа давлатларига ишга жўнатилгани хабар қилинганди.