Toshkent shahar, Mirzo Ulug‘bek tumani, Ziyolilar ko‘chasidagi yer maydoni va binolar kimoshdi savdosida sotildi. Ma’lumotlar “E-auksion” portalida e’lon qilingan.
Lot auksionga Davlat aktivlarini boshqarish agentligining Toshkent shahar hududiy boshqarmasi tomonidan joylashtirilgan edi.
Yer uchastkasining umumiy maydoni — 1 gektar. 14 kvadrat metr joyni egallagan binoda esa suv, gaz va elektr ta’minoti bor. Kanalizatsiya tizimi esa mavjud emas.
Auksionga qo‘yilgan yer maydoni va binoning boshlang‘ich bahosi 45,8 mlrd so‘m edi. 12-dekabr kuni bo‘lib o‘tgan savdoda u 48,1 mlrd so‘mga sotildi. Kimoshdi savdosining g‘olibi sifatida “Nazarov Rakhimbayev Group” MCHJ ko‘rsatilgan.
Mazkur MCHJ Murad Buildings va boshqa kompaniyalar bilan birgalikda O‘zbekiston quruvchilar assotsiatsiyasi ta’sischilaridan biri hisoblanadi.
Avvalroq Farg‘ona viloyatidagi sihatgoh 22,4 mlrd so‘mga sotilgani haqida xabar berilgan edi.
Izoh (0)