Andijonda sut mahsulotlarini qayta ishlash korxonasi elektr energiyasidan noqonuniy foydalanib kelgani aniqlandi. Bu haqda Energetika vazirligi matbuot xizmati xabar berdi.
Qayd etilishicha, iste’molchilar tomonidan elektr tarmoqlariga noqonuniy ulanish, elektr energiyasini talon-toroj qilish holatlarini aniqlash va ularga nisbatan tegishli choralar ko‘rish yuzasidan “O‘zenergoinspeksiya” tomonidan joylarda nazorat tadbirlari o‘tkazilmoqda.
Andijon shahar, Eski O‘sh ko‘chasida faoliyat yuritib kelayotgan “F.X.S” MCHJga qarashli sut mahsulotlarini qayta ishlash korxonasida shunday holat qayd etilgan. Korxonaning ikkinchi elektr uzatish liniyasidagi elektr o‘lchov priborlari dasturga kiritilmasdan noqonuniy foydalanib kelayotgani aniqlanib, hisobga olinmagan elektr energiyasi bo‘yicha 684,17 million so‘m qayta-hisob amalga oshirilgan.
Ushbu hajmdagi elektr energiyasi hozirgi kunda 6 mingta xonadonning bir oylik iste’moliga teng miqdorni tashkil qiladi.
O‘tkazilgan o‘rganishlar natijasida elektr energiyasidan noqonuniy foydalangan iste’molchining elektr qurilmalari tarmoqdan ajratilgan. Aniqlangan holat bo‘yicha tegishli choralar qo‘llash uchun hujjatlar huquqni muhofaza qiluvchi organlarga yuborilgan.
Ayni paytda elektr energiyasidan noqoqnuniy foydalanish holatlari bo‘yicha o‘rganishlar davom etmoqda.
Mavzuga doir: Olmaliqdagi korxona 5 mingga yaqin xonadonning bir kunlik iste’moliga teng gazdan noqonuniy foydalangani aniqlandi
Izoh (0)