Фарғонада ҳайдовчилик гувоҳномасини берувчи «Фарғона вилояти имтиҳон маркази» очилди. Бу ҳақда «Дарё» мухбири Азизжон Эрматов хабар бермоқда.
Фарғона тумани «Ўрташўра» маҳалла фуқаролар йиғини ҳудудида барпо этилган мазкур имтиҳон маркази бир кунда 450 нафардан ортиқ талабгорни назарий, 300 нафардан ортиқ талабгорни эса амалий имтиҳондан ўтказиш имкониятига эга.
Марказда назарий имтиҳонларни ўтказиш учун техник ва технологик воситалар билан махсус жиҳозланган хоналар, автомототранспорт воситаларининг барча тоифалари бўйича амалий имтиҳонларни топшириш учун автоматлаштирилган автодром мавжуд.
Қайд этилишича инновацион марказ — бу ҳайдовчилик гувоҳномасини олишга номзодлар учун назарий ва амалий синовлардан иборат автоматлаштирилган имтиҳон комплекси. Марказнинг афзалликларидан бири шундаки, номзодлар билимини баҳолашда инсон омили иштирок этмайди, бутун жараён автоматлаштирилган ҳамда шаффоф.
Марказнинг тантанали очилиш тадбирида вилоят ҳокими Хайрулло Бозоров, Ички ишлар вазирининг ўринбосари – Жамоат хавфсизлиги департаменти бошлиғи Бекмурод Абдуллаев, Ички ишлар вазирлиги Йўл ҳаракати хавфсизлиги бош бошқармаси бошлиғи Олим Саидов иштирок этди.
Изоҳ (0)