Владимир Путиннинг катта матбуот анжумани Янги йилгача ўтказилмайди. Бу ҳақда Россия президенти матбуот котиби Дмитрий Песков журналистларга маълум қилди.
«Катта матбуот анжуманига келсак, ҳа, у Янги йилгача бўлмайди. Шу билан бирга, президент журналистлар билан мулоқот қилиш учун имконият топади, деб ўйлаяпмиз. У буни мунтазам равишда амалга ошириб келади, шу жумладан, чет эл сафарлари чоғида ҳам», — деди Песков.
2022 йил охиригача президентнинг Федерал мажлисга мурожаати эълон қилиниш-қилинмаслиги ҳақидаги саволга жавобан, Кремль вакили шундай деди: «Мурожаат бўйича аниқлаштиришимиз керак. Мурожаат борасида ҳали тушунтириш берамиз».
Владимир Путин катта матбуот анжуманларини 2001 йилдан ўтказиб келади, 2012 йилдан улар декабрь ойида ташкил қилина бошлаган. Шу пайтгача фақат 2005 йилда президент анъанавий матбуот анжуманини ўтказмаган. Шунингдек, 2009 йилдан 2011 йилгача, Путин Россия бош вазири лавозимини эгаллаган даврда ҳам бу тадбир ташкил қилинмаган.
Аввалроқ Владимир Путиннинг йиллик катта матбуот анжумани 2022 йилда бўлиб ўтмаслиги мумкинлиги, ҳозирча уни йил охиригача ўтказиш тўғрисида якуний қарорга келинмагани маълум бўлганди. «РБК» манбалари якуний қарор қабул қилишда «бошқа нарсалар қатори махсус ҳарбий операция зонасидаги вазият ҳам ҳисобга олинишини» таъкидлаганди. Шунингдек, президентнинг Федерал Мажлисга мурожаати қачон бўлиб ўтиши аниқ эмасди, бунга тайёргарлик, Песков аввалроқ айтганидек, аллақачон бошланган.
Изоҳ (0)