Gruziyada ISHID yetakchilaridan biri qo‘lga olindi (foto)

Gruziyaning Tbilisi shahri xalqaro aeroportida ISHID yetakchilaridan biri qo‘lga olindi. Bu haqda Sputnik xabar berdi.

Ma’lum qilinishicha, terrorchi Gruziya Davlat xavfsizlik xizmatining aksilterror markazi harbiylari tomonidan ushlangan. Kist millatiga mansub chechen Tsiskara Toxosashvili 2015-yilda ISHID safida jang qilish uchun ketgan. Unga nisbatan xorijiy terrorchilik tashkilotiga qo‘shilish va terrorchilik faoliyatiga sherik bo‘lish fakti bo‘yicha jinoyat ishi qo‘zg‘atilgan. Toxosashvili 10 yildan 17 yilgacha ozodlikdan mahrum etilishi mumkin.

Yaqin Sharqda Toxosashvili Amir Iso nomi bilan mashhur bo‘lgan. U Suriya va Iroq hududida terrorchilik faoliyati va jangovar harakatlarda ishtirok etgan. “Ma’lum vaqt davomida mojaro zonasida terrorchilik tashkiloti bo‘linmalaridan biriga rahbarlik qilgan”, — deyiladi xabarda.

2019-yilda Toxosashvilining ukasi Sezar Toxosashvili terrorchilar doirasida Kiyevda hibsga olingan. Shundan so‘ng u mamlakat Bosh prokuraturasi talabiga binoan Gruziyaga ekstraditsiya qilingan. U xuddi shunday ayblovlar bilan uzoq muddatga qamalgan.

2014—2015-yillarda Pankisi darasidan yuzlab Kist chechenlari ISHID safida jang qilish uchun ketgan. Gruziyada ularga qarshi jinoiy ish qo‘zg‘atilgan.

ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.

Mavzuga doir:

• ISHID yetakchisi o‘ldirilganini ma’lum qildi — Reuters
• ISHID yetakchisi qamalga olingach, o‘zini portlatib yuborgan — Reuters