Gvatemala sudi sobiq prezident Otto Perez Molina va vitse-prezident Roksana Baldettini firibgarlik va fitnada ayblab, har birini 16 yilga ozodlikdan mahrum qildi. Bu haqda Al Jazeera xabar berdi.
Sudya Irma Jannet Valdezning so‘zlariga ko‘ra, Perez Molina pullarni noqonuniy o‘zlashtirish va bojxona firibgarligida aybdor deb topilgan. U har bir ayblov bo‘yicha sakkiz yilga hukm qilingan va Baldetti ham xuddi shunday jazo olgan.
Perez Molina va Baldetti 2015-yilda iste’foga chiqqan va La Linea yoki The Line deb nomlanuvchi bojxona korrupsiyasi sxemasidan foydalanishga ruxsat berganlik va undan foyda ko‘rganlikda ayblanib, hibsda bo‘lgan. Ushbu sxema korxonalarga pora evaziga import bojini to‘lashdan bo‘yin tovlash orqali davlatni aldashga qaratilgan.
1 million dollarga yaqin pora va 2 million dollarga yaqin davlat daromadi yo‘qotilgan bu ishga 30 ga yaqin shaxs, jumladan, bojxona xodimlari va tadbirkorlar aloqador bo‘lgan. Ayblanuvchilarning bir qismi oqlangan.
2012-yildan 2015-yilgacha davlatni boshqargan Perez Molina ayblovlarni rad etishda davom etmoqda. U yana ikkita ish yuzasidan tergov ostida qolmoqda.
“Bu yolg‘on. Hech kim hech qachon noqonuniy buyruq berganimni aytmagan va bunday qilmaganman. Ular hech qachon menga pora berilganini aytmagan. O‘zimni hafsalasi pir bo‘lgandek his qilyapman”, — degan 72 yoshli sobiq prezident.
Gvatemala sobiq prezidenti hukm ustidan shikoyat qilishini qo‘shimcha qilgan. Perez Molinaning jinoiy javobgarlikka tortilishi Birlashgan Millatlar Tashkiloti tomonidan qo‘llab-quvvatlanadigan korrupsiyaga qarshi missiyasi yordami bilan amalga oshirilmoqda.
Izoh (0)