Ayni vaqtda Prezident Administratsiyasi rahbari Sardor Umurzoqov raisligida aholi va iqtisodiyot tarmoqlarini energiya resurslari bilan mutanosib ta’minlash masalalarini tezkor va tizimli hal etib borish maqsadida tashkil etilgan Respublika shtabining navbatdagi yig‘ilishi o‘tkazilmoqda.
Yig‘ilishda hozirgi vaziyat tanqidiy-tahliliy ko‘rib chiqilishi, qilingan amaliy ishlar haqida mas’ullarning hisobotlari tinglanishi, shuningdek, holatni yanada barqarorlashtirish maqsadida yangi chora-tadbirlar ma’lum qilinmoqda.
Sardor Umurzoqov ikki kundan buyon hududlarda va mutasaddi vazirliklarda shtablar faoliyati ko‘rsatayotganini ta’kidlab, biroq, amaliy ishlar bilan birgalikda joylarda qator muammo va kamchiliklar hanuz kuzatilayotganini aytdi.
“Gaz quvurlarida bosimning me’yordan pastligi sababli respublika bo‘yicha jami 462 ta mahalladagi qariyb 62 ming ta xonadonga tabiiy gaz yetib bormayapti. Eng achinarlisi, vaqtinchalik cheklovlar kiritilgan bo‘lishiga qaramay, gazdan noqonuniy foydalanish holatlari uchramoqda.Ta’kidlanishicha, bu — iste’molchi kuz-qish mavsumida tabiiy gazdan ajratilishi belgilangan bo‘lishiga qaramasdan, “Hududgaz Poytaxt” gaz ta’minoti filiali tomonidan tabiiy gaz yetkazib berilayotganligi aniqlangan. Bunday holat qolgan barcha hududlarda ham mavjudligi aytildi.Jumladan, birgina Jizzax viloyatida o‘tkazilgan tezkor tadbirlarda bir kunda 4 ta korxonada tabiiy gazdan noqonuniy foydalanish holatlari aniqlangan.
Shuningdek, Toshkent viloyati, Yuqori chirchiq tumanida joylashgan “BEAUTY GLASS DECOR” shishani qayta ishlash korxonasi 2 dona shisha qayta ishlab pechlarida tabiiy gazdan foydalanib kelmoqda. Kunlik tabiiy gaz iste’moli 7 000 metr kubni tashkil qiladi”, — deydi Prezident Adminstratsiyasi rahbari.
Hududlarga biriktirilgan huquqni muhofaza qilish organlari rahbarlari joylardagi har bir korxona va tashkilotlarga kirib, gazdan noqonuniy foydalanish holatlarini aniqlash va ularni tezkor bartaraf etish choralarini ko‘rish bo‘yicha topshiriq berildi.
Ta’kidlanishicha, Olmaliqdagi g‘isht zavodi “schyotchik”larni nol qilib qo‘yib, noqonuniy gazga ulangan. Viloyat prokuraturasi Prezident Adminstratsiyasiga chiqib, “gazni o‘chirmaylik” degan.
“Viloyat prokuraturasining manfaati bormi bunday noqonuniy ulanishga? Haligi g‘isht zavodining Angrenda ham filiali bor ekan. Mirzamahmudov boshchiligadagi Komissiya Olmaliqqaa kelganini eshitib, darrov Angrendagi zavod yopilgan. Ushbu holat haqiqatan ham aniqlansa, barcha huquqiy baho berilib, jinoiy javobgarlikka tortiladi. Bundaylarni orqasida kimlar turganini, albatta, topamiz. Hokim, prokuror yoki soliqchimi, kim bo‘lsa ham tadbirkor bilan til biriktirganmi yoki beparvo bo‘lganmi — javobgarlikka tortiladi!”, — deydi Sardor Umurzoqov.
Izoh (0)