NATO mamlakatlari Afg‘oniston armiyasini qo‘llab-quvvatlash uchun foydalanilgan fondda qolgan mablag‘larni Ukrainaga berish imkoniyatini o‘rganmoqda. Kiyev avvalroq alyansga murojaat qilib, 3,4 milliard dollarning bir qismini olish masalasini ko‘rib chiqishni so‘ragandi. Bu haqda Politico besh nafar G‘arb mansabdorlariga tayanib xabar berdi.
Afg‘oniston mablag‘larini qayta taqsimlash imkoniyati umuman olganda, NATO ichkarisida kelishmovchiliklarni keltirib chiqarmaydi, biroq Ukrainaga qanday hajmdagi ko‘mak ajratilishi zarurligi borasida ziddiyatlar yuzaga keladi. Ayniqsa, bu masala inflyatsiyaning yuqori darajasi va yonilg‘ining qimmatlashuvi fonida retsessiya kutilayotgani tufayli yuzaga kelmoqda.
Afg‘oniston milliy armiyasi Maqsadli fondidagi mablag‘larning qayta taqsimlanishi NATOda bir oydan ortiq vaqt muhokama qilindi, shu jumladan, oktabr oyida Bryusseldagi uchrashuv chog‘ida ham. Fond muzlatib qo‘yilgan bo‘lib, alyans mablag‘larni alohida davlatlarga qaytarish yoki ularni boshqa joyga ko‘chirib, har bir donor mamlakatga mablag‘lar taqdirini mustaqil hal qilish imkoniyatini berish mexanizmi ustida ishlayotgandi.
Xususan, “afg‘on” mablag‘larining bir qismini Kiyevga yo‘naltirishni Litva Mudofaa vazirligi taklif etgandi, gap 2,876 million dollar haqida bormoqda. Bundan tashqari Niderlandiya TIV mamlakat fondga 134 million dollar kiritganini va bu summaning kamida bir qismi Ukrainaga berilishi kerakligini ma’lum qildi.
Afg‘oniston milliy armiyasi Maqsadli fondi respublika xavfsizlik kuchlariga ko‘mak bo‘yicha uchta fondning bittasi bo‘lib, u 2007-yilda NATO boshqaruvi ostida tuzilgan. Ikkinchi fondga BMT, uchinchisiga esa AQSH rahbarlik qilgan.
NATOning 2018-yilgi sammitida alyans a’zolari fondni 2024-yilgacha moliyalashtirishga tayyorligini tasdiqladi, o‘tgan yil fevraliga kelib, uning hajmi 3,4 milliard dollarga yetdi.
Biroq o‘tgan yil avgustida Afg‘onistonda hokimiyat “Tolibon” guruhi tomonidan egallab olingach, fonddan to‘lovlar muzlatib qo‘yildi. Bundan tashqari, AQSH Afg‘onistonni NATOdan tashqaridagi asosiy ittifoqchi maqomidan mahrum etdi.
Izoh (0)