Украинадаги ҳарбий низо исталган вақтда тугаши мумкин, аммо бунинг учун Украина раҳбарияти иродаси керак, деди Россия президенти матбуот котиби Дмитрий Песков.
«Ҳозирги ҳолатда буларнинг барчаси қачон тугаши ҳақида узундан-узоқ мулоҳаза қилиш мумкин. Зеленский бу қачон якунланишини билади. Агар хоҳиш бўлса, буларнинг барчаси эртагаёқ тугаши мумкин», — деди Песков.
Шу тариқа Песков Владимир Зеленскийнинг Politico нашрига қаратилган видеомурожаатидаги гапларига изоҳ берди, у Украинадаги низо 2023 йилга келиб якунланиши мумкинлигини тахмин қилганди. Зеленский Европанинг шу йилги энг таъсири кучли шахслари рейтингида етакчилик қилганидан кейин, у: «Ишонаманки, украиналиклар келаси йилда ҳам энг таъсири кучли бўлади, лекин у пайтда аллақачон тинч замон келган бўлади», — деди.
Украина ва Ғарб мамлакатлари низо якунланишининг асосий шарти барча эгалланган ҳудудлардан Россия қўшинларининг тўлиқ олиб кетилиши эканини кўп марта айтган. Зеленский музокаралар бошлаш учун Украина Россиядан «ҳудудий яхлитлигининг қайта тикланишини, БМТ Уставига нисбатан ҳурматни, уруш оқибатида етган барча зарарнинг қопланишини, ҳар битта ҳарбий жиноятчининг жазоланишини ва буларнинг барчаси такрорланмаслиги кафолатланишини» кутишини айтганди.
Изоҳ (0)