Ukraina prezidenti Vladimir Zelenskiy Politico nashri versiyasiga ko‘ra 2022-yilda Yevropaning eng nufuzli (ta’siri kuchli) odamiga aylandi.
“Siz qarang, yevropalik yetakchilar o‘sha mashhur yashil futbolkasini kiyib olgan 44 yoshli salobatli kishi bilan suratga tushish uchun Kiyevga yugurmoqda. Unga yonma-yon turish orqali, siyosatchilar ko‘zga tashlanishga orzumand bo‘lmoqda. Zelenskiy Yevropani uning kelajagi Ukraina bilan bog‘liqligiga ishontirdi — Rossiya fevralda bostirib kirguniga qadar bunga juda kam odam ishonardi”, — deyiladi Zelenskiyga bag‘ishlangan maqolada.
Politico’ning 2022-yilda Yevropaning eng ta’siri kuchli odamlari reytingiga 28 nafar siyosatchi kirdi. Ular orasida Rossiya prezidenti Vladimir Putin ham tilga olingan bo‘lib, uni nashr “yilning eng omadsiz odami” deb e’lon qildi.
“Vladimir Putinning buyuk Rossiya haqidagi orzusi amalga oshishi amri mahol. Uning Ukrainaga keng ko‘lamli bosqini qanday tez boshlangan bo‘lsa, shunday tezlikda muvaffaqiyatsizlikka uchray boshladi… Bu Rossiyani o‘zi yetarlicha baholamagan va nafratlanib kelgan dushmanini mag‘lub etishga qodir bo‘lmagan uchinchi darajali mamlakat mavqeyiga tushirib qo‘ydi, — deb yozadi Politico mualliflari. — Putinning qaysarligi urush, katta ehtimol bilan, cho‘zilib ketishini anglatadi… Putinning o‘z orzusini amalga oshirishga qodir emasligi u endi o‘z qo‘shnilari uchun dahshat solmasligini bildiradi”.
Ukraina prezidenti Vladimir Zelenskiy Amerikaning Time jurnali va Britaniyaning Financial Times gazetalari tomonidan ham yil odami deb e’lon qilingan.
Avvalroq Zelenskiy Politico nashriga qaratilgan videomurojaatida Ukrainadagi nizo 2023-yilga kelib yakunlanishi mumkin, deya taxmin qilgan edi. “Ishonamanki, ukrainaliklar kelasi yilda ham eng ta’siri kuchli bo‘ladi, lekin u paytda allaqachon tinch zamon kelgan bo‘ladi”, — dedi Zelenskiy.
Izoh (0)