Тошкент шаҳрида 5 декабрь куни иқлим ўзгариши мавзусида бўлиб ўтган йиғилишда қишлоқ хўжалиги вазири ўринбосари Алишер Тўраев Ўзбекистоннинг аграр соҳа ҳамда истеъмол учун сув ресурслари етарли миқдорда эканини айтиб ўтди, дея хабар бермоқда «Дарё» мухбири Абдуқаҳҳор Қосимов.
Алишер Тўраевнинг маълум қилишича, мамлакатда чучук сув миқдори тобора камаяётгани ҳақида айтилаётган бўлса ҳам, аслида сув захиралари етарли.
Чет эл экспертларининг хулосасига кўра, Ўзбекистонда сув етарли. Шунчаки биз сувни ёввойичасига ишлатамиз. Ундан фойдаланишни ўрганишимиз керак, — дейди вазир ўринбосари.Унинг таъкидлашича, Исроил замонавий технологиялар орқали сувни жуда тежаб ишлатади.
Ўзбекистон ҳам ана шу тажрибадан фойдаланиши зарур. Исроил технологиясини олиб келиб, ўзимизда йўлга қўйсак, бизда сув билан умуман муаммо бўлмайди. Маҳсулотни кўпайтирсак кўпайтирамизки, камайтирмаймиз. Ҳозирги тенденция бўйича кетсак, прогнозлар ёмон бўлмайди. Чунки ҳозир оммавий тарзда томчилаб суғориш йўлга қўйиляпти. Халқ ўрганяпти шуни, яхши бўлади, — деди Алишер Тўраев.Эслатиб ўтамиз, йиғилишда, шунингдек, Ўзбекистонда бир дақиқада 9 метр квадрат чўлланиш рўй бераётгани ҳақида айтиб ўтилган. Маълум қилинишича, қишлоқ хўжалигида сувдан фойдаланиш шу зайл давом этаверадиган бўлса, 2030 йилга бориб Ўзбекистон дунёдаги 33 та сув танқис давлатлар қаторига тушиб қолиши мумкин.
Сув ресурсларидан оқилона фойдаланиш масаласи
2023 йилда Италиянинг Рим шаҳрида атроф-муҳит ва сув ресурслари бўйича «Европа Иттифоқи—Марказий Осиё» халқаро конференцияси бўлиб ўтади. Унда иқлим ўзгариши оқибатларини юмшатиш, инклюзив «яшил ўсиш»га ўтиш, сувдан оқилона фойдаланиш, экологик хавфсизликни таъминлаш масалалари муҳокама қилинади.Қозоғистон пойтахти Остона шаҳрида 14 октябрь куни бўлиб ўтган МДҲга аъзо давлатлар раҳбарлари кенгашининг тор таркибдаги йиғилишида нутқ сўзлаган Қосим-Жўмарт Тўқаев иқлим ўзгаришининг салбий таъсирлари ҳақида айтиб ўтганди. Қозоғистон президентининг айтишича, МДҲнинг деярли барча мамлакатларида сув ресурслари билан таъминлаш муаммоси кучаймоқда.
«Бутун ҳамдўстлик маконида сув хавфсизлигини таъминлаш бўйича умумий ёндашувлар ишлаб чиқиш вақти келди. МДҲ Ижроия қўмитасига трансчегаравий сув ресурсларидан ўзаро манфаатли тарзда фойдаланиш бўйича муайян тавсиялар киритишни таклиф қиламан», — деганди Қосим-Жўмарт Тўқаев.
Мавзуга доир:
- Ўзбекистонда 2050 йилга бориб сув танқислиги беш баробарга ошиши маълум қилинди
- Ўзбекистонда сув танқислигининг оқибатларини юмшатиш бўйича алоҳида дастур қабул қилинади
Мавзудан ташқари
Алишер Тўраев мутахассислиги бўйича биолог-генетик, Ломоносов номидаги Москва давлат университетини тамомлаган. Вена университети, Ломоносов номидаги Москва давлат университетида, Россия Физика-техника институтида фаолият юритган.2019 йилнинг июнь ойидан 2021 йил февралигача Тошкент давлат аграр университети «Қишлоқ хўжалиги экинлари генетикаси, селексияси ва уруғчилиги» кафедраси профессори лавозимида ишлаган. Ўтган йилнинг февраль ойидан буён қишлоқ хўжалиги вазирининг ўринбосари — Қишлоқ хўжалигида билим ва инновациялар миллий маркази бош директори лавозимида фаолият юритиб келмоқда.
Жамоатчилик уни миллий марказ ўтказган 1 миллион дона узум кўчатини сотиб олиш бўйича шубҳали тендер орқали танийди. Ўшанда in vitro усулида етиштирилган 9,95 миллиард сўмлик узум кўчатларини етказиб бериш бўйича ўтказилган танловда De Nova Agro компанияси ғолиб бўлганди. Компания асосчиси бўлган Бекжон Тўраев эса Алишер Тўраевнинг ўғли ҳисобланади.
Тендер натижалари атрофидаги ҳолатни ўрганиш юзасидан Қишлоқ хўжалиги вазирлиги томонидан комиссия тузилган. Монополияга қарши курашиш қўмитаси матбуот хизмати ҳам манфаатлар тўқнашуви бўлиши мумкин бўлган вазиятни ўрганаётганини маълум қилган. Ўрганиш натижалари нима билан якунлангани номаълум.