“Rosatom” O‘zbekistonda kompozit klaster yaratish bo‘yicha ish olib borayotganini ma’lum qildi

Rossiyaning “Rosatom” davlat korporatsiyasi O‘zbekiston bilan nafaqat yadro sohasida, balki yuqori texnologiyalar sohasida ham hamkorlikni, jumladan, qo‘shma kompozit klaster yaratish bo‘yicha ishlarni rivojlantirmoqda. Bu haqda “Rosatom” bosh direktori Aleksey Lixachev ma’lum qildi.

Biz nafaqat yadroviy masalalar bilan cheklanib qolmay, balki yuqori texnologiyalar sohasida faol hamkorlik qilmoqdamiz. Xususan, bu yerda O‘zbekiston hududida har ikki davlatimiz manfaatlarini ko‘zlab, qo‘shma kompozit klaster yaratmoqchimiz, — deydi u.

Lixachev rossiyalik va o‘zbekistonlik mutaxassislar “bir katta Sovet yadro olimlari oilasidan” chiqqanini ta’kidladi. 

O‘zbekiston shu ma’noda ham ilm-fan, ham uran qazib olish bo‘yicha yadro oilasi a’zosi, — deya qo‘shimcha qildi u.

Avvalroq O‘zbekistondagi tadqiqot reaktori uchun “Rosatom” yadro yonilg‘isi yetkazib berishi haqida xabar berilgan edi.