Energetika vazirligi ijtimoiy tarmoqlarda “AI-80 rusumli benzin yo‘q deb qimmat benzinlarni sotishayotgan ekan” mazmunida tarqalgan xabarlar yuzasidan munosabat bildirdi.
Vazirlik matbuot xizmati xabariga ko‘ra, hozirgi kunda “O‘zbekneftgaz” AJ tasarrufidagi AYOQSHlarda AI-80 rusumli avtobenzinning narxi oshirilmagan va uning 1 litri 6 800 so‘mligicha saqlanib qolmoqda. Shuningdek, AI-92 markali avtobenzin 9500 so‘mdan va AI-95 markali avtobenzin 10 500 so‘mdan sotilmoqda.
“Bugungi kunda respublika neftni qayta ishlash zavodlarida sutkasida 4 000 tonnadan avtobenzin ishlab chiqarilib, birja savdolari orqali iste’molchilar ehtiyojlari uchun yo‘naltirilmoqda. Bundan tashqari avtobenzin zaxirasi yetarli ekanligini ma’lum qilamiz”, — deyiladi xabarda.
Shuningdek, qayd etilishicha, xususiy tadbirkorlar tomonidan qo‘shimcha avtobenzin importi amalga oshirilib kelinmoqda. 2022-yil boshidan bir oyda o‘rtacha 10 ming tonna avtobenzin import qilinmoqda.
Bundan tashqari, xomashyo importi hajmlarini oshirish hisobiga avtobenzin ishlab chiqarish va birja savdolariga qo‘yib borilayotgan avtobenzin hajmlarini oshirish choralari ko‘rilmoqda.
Bundan avval “O‘zbekneftgaz” AJ o‘z tasarrufidagi AYOQSHlarda AI-80 rusumli avtobenzin narxi oshmagani, iste’molchilarga barqaror yetkazib berish ta’minlanayotganini ma’lum qilgandi.
Izoh (0)