Toshkent metropoliteni ma’muriyati sovuq kunlarda yo‘lovchilar soni keskin oshgani sabab yo‘lovchilarga murojaat bilan chiqdi.
Qayd etilishicha, 5-dekabrdan boshlab kunlar sovib ketishi munosabati bilan metrodan foydalanuvchi yo‘lovchilarning soni keskin oshib, shu kuni 620 ming kishini tashkil qildi. Bu o‘tgan haftaning bir kuniga nisbatan 105 ming (21 foiz) yo‘lovchiga ko‘p.
2020-yil dekabrida bir kunda 240 ming yo‘lovchi, 2021-yil dekabrida bir kunda 400 ming yo‘lovchi tashilgan bo‘lsa, 2022-yil dekabrida esa bir kunda 620 mingni tashkil qildi. Bu ko‘rsatkich 2020-yilga nisbatan 380 mingga (258 foizga), 2021-yilga nisbatan 220 mingga (155 foizga) oshganini ko‘rsatmoqda.
Yo‘lovchilar ushbu vaziyatga to‘g‘ri baho bergan holda metropolitendan foydalanish qoidalariga doimiy amal qilishlarini so‘raymiz. Harakatlanish vaqtida o‘zaro hurmatni saqlash, poyezd ichidagi yo‘lovchilar chiqib ketguniga qadar kirish uchun vagon eshiklari oldida turmaslik, manzilga kelgach poyezdan chiqish uchun imkon qadar tezroq harakat qilish, vagon eshiklariga suyanmaslik, shaxsiy buyumlarni vagon va metro hududida qoldirmaslik talab etiladi.Shuningdek, metrodan doimiy tarzda foydalanuvchi yo‘lovchilar to‘lovni bank va transport kartalari orqali amalga oshirsa, o‘z vaqtlarini tejashlari hamda kassa oldidagi tirbandlikni maksimal darajada kamaytirishga yordam berishi qo‘shimcha qilingan.Yuqoridagi talablarga amal qilmaslik metro vagonlari eshiklari ishdan chiqishiga, har xil nosozliklar kelib chiqishiga va buning natijasida oraliq intervallarning uzayib ketishiga olib keladi, — deyiladi metropoliten ma’muriyati xabarida.
Mavzuga doir:
Izoh (0)