Tarixda birinchi marta Isroil prezidenti Isxak Gersog qirol Hamad bin Iso al-Xalifaning taklifiga binoan Bahraynga yo‘l oldi. Bu haqda Isroil rahbari kanselyariyasi xabar berdi.
“Bu Isroil va arab davlatlari o‘rtasidagi munosabatlarda ‘Ibrohim kelishuvlari’ imzolanishi bilan ta’minlangan yana bir tarixiy qadam, shuningdek, Isroil bilan tinchlik doirasiga yangi mamlakatlarni kiritish yo‘lidagi qadamlardan biri. Men Bahrayn qiroli hamda uning hukumati mehmoni bo‘laman va o‘zaro manfaatli masalalar muhokamasiga umid qilaman”, — degan Gersog Bahraynga uchishidan oldin.
Isroil prezidenti Bahrayn poytaxti Manamaga tashrif buyuradi, qirol, qirollik rasmiylari va yahudiy jamiyati vakillari bilan uchrashadi. Isroil sanoati va iqtisodiyoti vakillari bilan birgalikda Bahrayn Iqtisodiy rivojlanish kengashiga tashrif buyuradi, deyiladi kanselyariya xabarida.
Bundan tashqari, 5-dekabr kuni u Birlashgan Arab Amirliklariga (BAA) uchadi, u yerda Abu-Dabidagi kosmik konferensiyada ishtirok etadi va prezident Muhammad bin Zaid al-Nahayon bilan uchrashadi, deya qo‘shimcha qilingan xabarda. Bu ularning to‘rtinchi uchrashuvi bo‘lib, ikki davlat rahbarlari munosabatlarni mustahkamlash, tinchlikning ahamiyati va ikki tomonlama hamkorlikni kengaytirish yo‘llarini muhokama qiladi.
2020-yilda Isroil Bahrayn va BAA bilan munosabatlarni normallashtirishga kelishib olgandi. Bitim “Ibrohim kelishuvi” deb ataldi. BAA va Bahrayn bilan shartnoma tuzilgunga qadar yahudiy davlati arab davlatlari orasida faqat Misr va Iordaniya bilan diplomatik munosabatlarga ega edi.
May oyida Isroil BAA bilan erkin savdo shartnomasini imzoladi. The Jerusalem Post xabariga ko‘ra, oziq-ovqat, kosmetika, tibbiy asbob-uskunalar va dori-darmon kabi mahsulotlarning 96 foiziga bojxona to‘lovlari bekor qilingan. Bu yahudiy davlati va arab davlati o‘rtasidagi birinchi shunday kelishuv. Isroil Bahrayn bilan ham yil oxirigacha shunday bitim tuzishni rejalashtirmoqda.
Izoh (0)