Koronavirus lokdaunlariga qarshi ommaviy noroziliklar Xitoyning yirik shaharlariga tarqaldi, deb yozadi Daily Mail.
28-noyabrga o‘tar kechasi Xitoyning yirik shaharlarida mamlakat hukumati koronavirusga qarshi kurash bilan izohlayotgan qat’iy cheklov choralariga qarshi ommaviy namoyishlar davom etdi.
Pekinda namoyishchilar diplomatik muassasalar joylashgan tumanda ko‘chalarga chiqdi, ularning ko‘pchiligi mamlakatdagi senzuraga qarshilik belgisi sifatida qo‘llarida oq qog‘ozlar ko‘tarib olgan.
https://twitter.com/AskAnshul/status/1596930756118745088
Odamlar “Karantinni bekor qiling”, “Si Szinpin iste’foga chiqsin, Kommunistik partiya iste’foga chiqsin”, “Shinjonni oching, Xitoyni oching”, “Bizga PZR-testlar kerak emas, bizga erkinlik kerak” degan shiorlar va talablar bilan chiqqan. Politsiya jalb etilgan, necha kishi qo‘lga olingani aniq emas.
Norozilik harakatlari Xitoyning Shanxay, Chendu, Chunsin, Uxan va Nankin kabi boshqa megapolislarida ham bo‘lib o‘tdi. Universitetlarda ham noroziliklar kuchaymoqda, ijtimoiy tarmoqlar namoyishlar aks etgan videolarga to‘lib ketdi.
https://twitter.com/nytimes/status/1596918605932728320
Xitoy hukumati koronavirusga nisbatan “nol bardoshlilik” siyosatini olib bormoqda: shaharlarda butun boshli dahalar yopib tashlanmoqda, kasallanganlar bilan aloqada bo‘lgan odamlar majburan karantinga yuborilmoqda, bemorlar kasalxonalarda izolyatsiya qilinmoqda, mamlakat chegaralari esa aslida yopiq bo‘lib qolmoqda.
https://twitter.com/CitizenFreePres/status/1596865384044711939
Noroziliklar Shinjon-Uyg‘ur muxtor tumanining Urumchi shahridagi turar-joylardan birida yong‘in chiqqanidan keyin boshlangandi. 24-noyabr kuni yuz bergan hodisada kamida o‘n kishi halok bo‘lib, yana to‘qqiz kishi jarohatlangandi.
https://twitter.com/JackPosobiec/status/1597051747133845504
Guvohlar qayd etishicha, lokdaun tufayli kvartiralar eshiklari yopib tashlangani uchun, odamlar tashqariga chiqa olmagan, cheklov choralari sababli esa qutqaruv xizmatlari vaqtida yetib kela olmagan. Xitoy hukumati buni rad etmoqda.
Avvalroq Xitoyda kunlik kasallanishlar soni pandemiya boshidan buyon rekord darajaga yetgani xabar berilgandi. Chunonchi, 23-noyabr kuni mamlakatda 31 656 kishi kasallikka chalingan. South China Morning Post gazetasi yozishicha, shu kuni Xitoyda kasallanishlar soni bo‘yicha rekord o‘rnatilgan. 24-noyabr kuni esa 32 943 kishida koronavirus aniqlandi.
Izoh (0)