Xitoyda bir kunda pandemiya boshidan buyon rekord darajada ko‘p odam koronavirusga chalindi

Xitoyda 24-noyabr kuni 32 943 kishi koronavirusga chalindi, deb xabar bermoqda Milliy sog‘liqni saqlash komissiyasi.

Hukumat ma’lumotlariga ko‘ra, kasallik alomatlari 3103 kishida aniqlangan, 29 840 kishi uni simptomlarsiz o‘tkazmoqda. Eng ko‘p Xitoy janubi-sharqidagi Guandun provinsiyasi jabr ko‘rgan — u yerda 8499 ta yangi holat qayd etilgan.

Xitoy hukumati mamlakatda aniqlangan kasallanish holatlarining barchasini simptomlar aniq aks etadigan va simptomsiz o‘tadigan holatlarga ajratadi. Ikkala holatda ham hukumat bemorning xorijdan kelgani yoki mamlakat ichida kasallanganini hisobga oladi.

Yuqorida tilga olingan holatlarning barchasi qit’a Xitoyiga tegishli. Gonkong, Makao va Xitoy o‘z hududi deb hisoblaydigan Tayvan uchun statistika alohida olib boriladi.

23-noyabr kuni esa mamlakatda 31 656 kishi kasallikka chalingan. South China Morning Post gazetasi yozishicha, shu kuni Xitoyda kasallanishlar soni bo‘yicha rekord o‘rnatilgan.

Pandemiya boshidan buyon aniq aks etgan simptomlar Xitoyning 300,6 ming nafar fuqarosida qayd etilgan, shularning 5,2 mingi vafot etgan. Komissiya aniqlik kiritishicha, o‘tgan bir kecha-kunduz ichida bemorlar orasida o‘lim holatlari bo‘lmagan.

Xitoyda infeksiyaning navbatdagi to‘lqini fonida cheklovlar kiritila boshladi. Chunonchi, ba’zi provinsiyalarda, shu jumladan, Guandunda maktablar va universitetlar masofadan ishlash rejimiga o‘tkazildi, bolalar bog‘chalari ishlashdan to‘xtadi. Pekin hukumati aholiga manfiy natijali PZR-testsiz jamoat joylariga tashrif buyurishni taqiqladi. Taqiq transport, savdo markazlari, supermarketlar, mehmonxonalar va ma’muriy binolarga taalluqli. Jamoat joyiga borishdan 48 soat avval topshirilgan PZR-test haqiqiy deb hisoblaniladi.