Harbiy ekspertlar fikricha, Rossiya Ukrainani 10 kun ichida egallab olishni rejalashtirgan, biroq o‘ta yuqori darajadagi maxfiylik va rossiyaliklar tayyorgarligining pastligi tufayli bu reja muvaffaqiyatsizlikka uchragan. Bu haqda Britaniyaning Birlashgan kuchlar qirollik instituti (RUSI) tadqiqotida aytiladi.
Ma’ruzaga harbiy ekspertlar Jek Uotling va Nik Reynolds, Ukraina mudofaa vaziri sobiq maslahatchisi, RUSI’ga a’zo muxbir Aleksandr Danilyuk va Ukraina Desant-hujum qo‘shinlari sobiq qo‘mondoni Mixail Zabrodskiy mualliflik qilgan.
Ekspertlar fikriga ko‘ra, Rossiyaning rejasi Ukrainaga o‘n kun ichida kirib olib, so‘ng 2022-yil avgustigacha mamlakatni bosib olish va o‘ziga qo‘shib olishdan iborat bo‘lgan.
Rossiyada hujum tezligi va dezinformatsiya kampaniyasi Ukraina poytaxtini tezkorlik bilan zabt etishni ta’minlay olishiga umid qilishgan.
Bundan tashqari, Kiyev ostonalarida rossiyaliklar kuch bo‘yicha 12:1 nisbatida ustunlikka erishgan.
Biroq Rossiya qo‘shinlari o‘z rejasini samarali tarzda amalga oshirish uchun taktik darajada tayyor bo‘lmagan.
Bundan tashqari, Kiyevga hujum qilish niyati haqida Rossiya bo‘linmalarining ko‘pchiligi xabardor bo‘lmagan va hujum qilish haqidagi buyruqlarni bostirib kirishdan ko‘pi bilan 24 soat avvalroq olgan.
Rossiyaliklarga o‘q-dorilar, yonilg‘i, oziq-ovqat va o‘z xatti-harakatlarining umumiy rejaga qanday aloqadorligi haqidagi aniq tushuncha yetishmagan.
Shu tariqa, maxfiylikni saqlab qolish evaziga, Rossiya qurolli kuchlari tezkor darajada kutilmagan harakatlari bilan ustunlikka ega bo‘lgan, ammo taktik darajada esa Ukraina qurolli kuchlari nima qilishlari kerakligini yaxshiroq tushungan, chunki ular sakkiz yil davomida Rossiya armiyasi hujumini qaytarishga tayyorlangan.
Ma’ruzada aytilishicha, Rossiya rejasining eng katta kamchiligi reversive harakatlarning yo‘qligi bo‘lgan.
Oqibatda, tezlik istalgan natijalarni bermagach, Rossiya qo‘shinlari ularning pozitsiyasi Ukrainadagi safarbarlik fonida muntazam yomonlashib borayotganini tushunib yetgan.
Katta masofalarga o‘q otish Rossiya logistikasini xavf ostiga qo‘yganidan keyingina Ukraina qurolli kuchlari Rossiya qo‘lidan tashabbusni olib qo‘ygan.
Ta’kidlanishicha, rossiyalik harbiylarning taktik qobiliyati Rossiya va Ukrainadagi, shuningdek, xorijdagi ko‘plab kuzatuvchilar kutganidan ko‘ra ancha past bo‘lib chiqqan.
Xususan, ma’ruza mualliflari shunday xulosaga kelganki, rossiyalik istilochilar aldanishga moyil: eng yuqori instansiyalar frontdagi qo‘l ostidagi odamlar tomonidan yig‘ilgan dastlabki axborotga juda ishonadi va bu ma’lumotning haqiqiyligini tekshirib ko‘rmaydi.
Shu bilan birga, Rossiya qo‘mondonligi muvaffaqiyatsizliklar haqidagi ro‘yirost ma’ruzalarni rag‘batlantirmaydi, bu esa tahlilni qiyinlashtiradi.
Bundan tashqari, rossiyaliklar doim muhit o‘zgarishi natijasini o‘z ma’nosini yo‘qotgan buyruqni ham bajarishga intiladi.
Rossiyaning batalyon-taktik guruhlar (BTG) tomonidan jangovar harakatlar olib borilishi tizimi ham samarasiz bo‘lib chiqqan.
Istilo boshlangach, rossiyaliklar ko‘plab ukrainalik generallarga shaxsiy maktublar jo‘natib, taslim bo‘lishga chaqirgan va Rossiya Ukrainaga ziyon yetkazmasligiga ishontirgan.
Ukraina qurolli kuchlarining deyarli barcha polkovniklari anonim raqamlardan shunga o‘xshash shaxsiy xabarlar olgan. Bundan tashqari, istiloning ikkinchi kuni Ukraina qo‘mondonligiga Rossiya prezidenti Vladimir Putin shaxsan murojaat qilgan va Kiyevda hukumatni ag‘darishga da’vat etgan.
Ma’ruzada aytilishicha, bu sa’y-harakatlarning muvaffaqiyatsizlikka uchragani shundan darak beradiki, Rossiya maxsus xizmatlari ukrainalik harbiylar psixologiyasiga to‘g‘ri baho bera olmagan.
Institutda qayd etishlaricha, ushbu hisobotdagi ma’lumotlar katta qismining manbalari hozircha oshkor qilina olmaydi, shu sababli buni “metodologik jihatdan tugallanmagan” guvohliklar sifatida qabul qilish lozim.
Yakunda ma’ruza mualliflari ta’kidlashicha, Ukrainada sheriklaridan yaxshiroq ko‘mak kerak. Ularning fikricha, Ukraina g‘alabasi ahamiyatli darajada og‘ir jangovar harakatlarni talab qiladi, biroq zarur ko‘mak berilgan taqdirda, Ukraina g‘olib bo‘lishi mumkin.
Izoh (0)