Oq uy AQSH va Fransiya prezidentlari Jo Bayden va Emmanuel Makronning 1-dekabr kungi tantanali kechki ovqatiga 500 ming dollar sarfladi. Bu haqda CNN hisob-kitoblaridan ma’lum bo‘ldi.
“Bizda mavjud bo‘lgan so‘nggi ma’lumotlarga ko‘ra, bu yarim million dollarni tashkil qiladi”, — deyiladi CNN xabarida.
Bu summaga nafaqat qimmatbaho idishlar, balki bezaklar, shuningdek, idish-tovoq ijarasi ham kiradi. Avvalroq ikki davlat yetakchilarining kechki ziyofati menyusi taqdim etilgan edi.
29-noyabr kuni Makron Vashingtonga to‘rt kunlik davlat tashrifi bilan kelgandi. U Jo Bayden prezidentligi davrida AQSHga davlat tashrifi bilan kelgan birinchi xorijiy yetakchiga aylandi. 1-dekabr kuni Fransiya rahbari Oq uyda maxsus harbiy ehtirom bilan kutib olindi.
Avvalroq Bayden Twitter sahifasiga Makron bilan muzqaymoqxo‘rlik qilayotgani aks etgan suratni joylagandi. Suratda ikki davlat yetakchilari va ularning rafiqalari Vashingtondagi Fiola Mare italyan restoranida o‘tirganini ko‘rish mumkin.
Izoh (0)