“Germaniya qurolli kuchlari o‘q-dorilar tanqisligiga duch keldi” — Olaf Shols

Germaniya Qurolli kuchlari (Bundesver) mushkul vaziyatga tushgan, aniqrog‘i, o‘q-dorilar tanqisligini boshidan kechirmoqda. Bu haqda Germaniya kansleri Olaf Shols NATO bosh kotibi Yens Stoltenberg bilan qo‘shma matbuot anjumanida ma’lum qildi.

Sholsning so‘zlariga ko‘ra, so‘nggi bir necha o‘n yilliklar davomida Germaniya hukumati armiyani o‘q-dorilar bilan ta’minlash bo‘yicha noto‘g‘ri yo‘ldan yurib kelgan. “Hozir shu narsani aniq anglab yetdikki, qurol-yarog‘ zaxiralarini doimiy to‘ldirib turish imkoniyatiga ega bo‘lish juda muhim, bu nafaqat Ukrainadagi urush tufayli, balki biz o‘z raqamlarimizga ham e’tibor berishimiz sabablidir”, — dedi u.

Shu bilan birga, Shols ta’kidlashicha, Germaniya mudofaa vaziri Kristina Lambrext “bu kamchilikni bartaraf etishga katta qiziqish bildirgan”.

Germaniya hukumati qurol-yarog‘ zaxiralari tanqisligi haqida birinchi marta gapirayotgani yo‘q. Avgust oyida bu haqda Germaniya tashqi ishlar vaziri Annalena Berbok ma’lum qilgandi. Germaniya sanoati bunday sharoitlarda Ukraina uchun ataylab qurol ishlab chiqarishga majbur bo‘lgan.

Noyabrda Germaniya mudofaa vaziri mamlakat NATO qarshisidagi majburiyatlari tufayli, uchinchi mamlakatlarning qurol-yarog‘ yetkazish haqidagi iltimoslariga javob qilishi qiyin ekanini aytgandi. Shu bilan birga, Lambrext Berlin Ukrainaga yordam ko‘rsatishda davom etishini ta’kidladi.

Oktabrda Business Insider nashri Bundestag rasmiy shaxslari va harbiy sanoat vakillari orasidagi manbalariga tayanib, jangovar harakatlar boshlanib qolgan taqdirda, Germaniya armiyasi bor-yo‘g‘i ikki kun jang qila olishi haqida yozgandi. Nashr ma’lumotlariga ko‘ra, Germaniya faqat o‘q-dorilar sotib olishga 20 milliard yevro sarflashi kerak, ayni vaqtda esa omborlar yetishmaydi, natijada bu masala bo‘yicha oldinda “ancha sa’y-harakatlar” kutmoqda.

Business Insider qayd etishicha, NATO qoidalariga ko‘ra, unga a’zo mamlakatlar 30 kunlik jangovar harakatlar uchun yetarli miqdorda o‘q-dorilarga ega bo‘lishi shart.