Ҳарбий экспертлар фикрича, Россия Украинани 10 кун ичида эгаллаб олишни режалаштирган, бироқ ўта юқори даражадаги махфийлик ва россияликлар тайёргарлигининг пастлиги туфайли бу режа муваффақиятсизликка учраган. Бу ҳақда Британиянинг Бирлашган кучлар қироллик институти (РУSI) тадқиқотида айтилади.
Маърузага ҳарбий экспертлар Жек Уотлинг ва Ник Рейнолдс, Украина мудофаа вазири собиқ маслаҳатчиси, РУSI’га аъзо мухбир Александр Данилюк ва Украина Десант-ҳужум қўшинлари собиқ қўмондони Михаил Забродский муаллифлик қилган.
Экспертлар фикрига кўра, Россиянинг режаси Украинага ўн кун ичида кириб олиб, сўнг 2022 йил августигача мамлакатни босиб олиш ва ўзига қўшиб олишдан иборат бўлган.
Россияда ҳужум тезлиги ва дезинформация кампанияси Украина пойтахтини тезкорлик билан забт этишни таъминлай олишига умид қилишган.
Бундан ташқари, Киев остоналарида россияликлар куч бўйича 12:1 нисбатида устунликка эришган.
Бироқ Россия қўшинлари ўз режасини самарали тарзда амалга ошириш учун тактик даражада тайёр бўлмаган.
Бундан ташқари, Киевга ҳужум қилиш нияти ҳақида Россия бўлинмаларининг кўпчилиги хабардор бўлмаган ва ҳужум қилиш ҳақидаги буйруқларни бостириб киришдан кўпи билан 24 соат аввалроқ олган.
Россияликларга ўқ-дорилар, ёнилғи, озиқ-овқат ва ўз хатти-ҳаракатларининг умумий режага қандай алоқадорлиги ҳақидаги аниқ тушунча етишмаган.
Шу тариқа, махфийликни сақлаб қолиш эвазига, Россия қуролли кучлари тезкор даражада кутилмаган ҳаракатлари билан устунликка эга бўлган, аммо тактик даражада эса Украина қуролли кучлари нима қилишлари кераклигини яхшироқ тушунган, чунки улар саккиз йил давомида Россия армияси ҳужумини қайтаришга тайёрланган.
Маърузада айтилишича, Россия режасининг энг катта камчилиги реверсиве ҳаракатларнинг йўқлиги бўлган.
Оқибатда, тезлик исталган натижаларни бермагач, Россия қўшинлари уларнинг позицияси Украинадаги сафарбарлик фонида мунтазам ёмонлашиб бораётганини тушуниб етган.
Катта масофаларга ўқ отиш Россия логистикасини хавф остига қўйганидан кейингина Украина қуролли кучлари Россия қўлидан ташаббусни олиб қўйган.
Таъкидланишича, россиялик ҳарбийларнинг тактик қобилияти Россия ва Украинадаги, шунингдек, хориждаги кўплаб кузатувчилар кутганидан кўра анча паст бўлиб чиққан.
Хусусан, маъруза муаллифлари шундай хулосага келганки, россиялик истилочилар алданишга мойил: энг юқори инстанциялар фронтдаги қўл остидаги одамлар томонидан йиғилган дастлабки ахборотга жуда ишонади ва бу маълумотнинг ҳақиқийлигини текшириб кўрмайди.
Шу билан бирга, Россия қўмондонлиги муваффақиятсизликлар ҳақидаги рўйирост маърузаларни рағбатлантирмайди, бу эса таҳлилни қийинлаштиради.
Бундан ташқари, россияликлар доим муҳит ўзгариши натижасини ўз маъносини йўқотган буйруқни ҳам бажаришга интилади.
Россиянинг батальон-тактик гуруҳлар (БТГ) томонидан жанговар ҳаракатлар олиб борилиши тизими ҳам самарасиз бўлиб чиққан.
Истило бошлангач, россияликлар кўплаб украиналик генералларга шахсий мактублар жўнатиб, таслим бўлишга чақирган ва Россия Украинага зиён етказмаслигига ишонтирган.
Украина қуролли кучларининг деярли барча полковниклари аноним рақамлардан шунга ўхшаш шахсий хабарлар олган. Бундан ташқари, истилонинг иккинчи куни Украина қўмондонлигига Россия президенти Владимир Путин шахсан мурожаат қилган ва Киевда ҳукуматни ағдаришга даъват этган.
Маърузада айтилишича, бу саъй-ҳаракатларнинг муваффақиятсизликка учрагани шундан дарак берадики, Россия махсус хизматлари украиналик ҳарбийлар психологиясига тўғри баҳо бера олмаган.
Институтда қайд этишларича, ушбу ҳисоботдаги маълумотлар катта қисмининг манбалари ҳозирча ошкор қилина олмайди, шу сабабли буни «методологик жиҳатдан тугалланмаган» гувоҳликлар сифатида қабул қилиш лозим.
Якунда маъруза муаллифлари таъкидлашича, Украинада шерикларидан яхшироқ кўмак керак. Уларнинг фикрича, Украина ғалабаси аҳамиятли даражада оғир жанговар ҳаракатларни талаб қилади, бироқ зарур кўмак берилган тақдирда, Украина ғолиб бўлиши мумкин.
Изоҳ (0)