Rossiya bosh vaziri Mixail Mishustin mamlakat O‘zbekistonga kungaboqar yog‘i, qandolat mahsulotlari va bug‘doy eksportini oshirishga tayyorligi ma’lum qildi. Bu haqda O‘zbekiston—Rossiya ishbilarmonlar forumida aytib o‘tdi. 

Uning ta’kidlashicha, joriy yilning yanvar—oktabr oylarida o‘zaro qishloq xo‘jaligi mahsulotlari va oziq-ovqat mahsulotlari ayirboshlash hajmi qariyb 40 foizga oshgan va bir yarim milliard dollarga yaqinlashgan. 

Rossiya kungaboqar yog‘i, qandolat mahsulotlari, bug‘doy eksportini ko‘paytirishga tayyor, boshqa mahsulotlar bo‘yicha ham takliflar bor, — dedi Rossiya hukumati rahbari.

2022-yilning yanvar—oktabr oylariga ko‘ra O‘zbekistonga olib kelinadigan bug‘doyning 97,3 foizi, bug‘doy unining 94,8 foizi Qozog‘iston hisobiga to‘g‘ri keladi. Shuningdek, Qozog‘iston O‘zbekistonga kungaboqar yog‘ining asosiy eksport qiluvchilaridan biri hisoblanadi.

Rossiya O‘zbekistonga mazkur mahsulotlar eksportini oshirmoqchi bo‘lsa, Qozog‘iston bilan raqobatlashishiga to‘g‘ri keladi. 

Joriy yilning o‘n oyida O‘zbekiston Rossiyadan 680 mln dollarlik oziq-ovqat mahsulotlarini import qilgan. Bu o‘tgan yilning mos davriga nisbatan 107 mln dollarga ko‘pdir. 

Avgustda Qozog‘iston oziq-ovqat xavfsizligini ta’minlash maqsadida bug‘doy va un eksportiga kvota joriy etishga qaror qilgan edi. Cheklovlar 14-sentabrdan boshlab bekor qilingan.