Россия бош вазири Михаил Мишустин мамлакат Ўзбекистонга кунгабоқар ёғи, қандолат маҳсулотлари ва буғдой экспортини оширишга тайёрлиги маълум қилди. Бу ҳақда Ўзбекистон—Россия ишбилармонлар форумида айтиб ўтди.
Унинг таъкидлашича, жорий йилнинг январь—октябрь ойларида ўзаро қишлоқ хўжалиги маҳсулотлари ва озиқ-овқат маҳсулотлари айирбошлаш ҳажми қарийб 40 фоизга ошган ва бир ярим миллиард долларга яқинлашган.
Россия кунгабоқар ёғи, қандолат маҳсулотлари, буғдой экспортини кўпайтиришга тайёр, бошқа маҳсулотлар бўйича ҳам таклифлар бор, — деди Россия ҳукумати раҳбари.
2022 йилнинг январь—октябрь ойларига кўра Ўзбекистонга олиб келинадиган буғдойнинг 97,3 фоизи, буғдой унининг 94,8 фоизи Қозоғистон ҳисобига тўғри келади. Шунингдек, Қозоғистон Ўзбекистонга кунгабоқар ёғининг асосий экспорт қилувчиларидан бири ҳисобланади.
Россия Ўзбекистонга мазкур маҳсулотлар экспортини оширмоқчи бўлса, Қозоғистон билан рақобатлашишига тўғри келади.
Жорий йилнинг ўн ойида Ўзбекистон Россиядан 680 млн долларлик озиқ-овқат маҳсулотларини импорт қилган. Бу ўтган йилнинг мос даврига нисбатан 107 млн долларга кўпдир.
Августда Қозоғистон озиқ-овқат хавфсизлигини таъминлаш мақсадида буғдой ва ун экспортига квота жорий этишга қарор қилган эди. Чекловлар 14 сентябрдан бошлаб бекор қилинган.
Изоҳ (0)