Farg‘ona viloyati Dang‘ara tumanida 26-noyabr kuni o‘zgaga tegishli avtomashinani olib qochgan shaxs qo‘lga tushdi. Bu haqda Tergov departamenti xabar qildi.
Qayd etilishicha, shu kuni soat 02:00 larda noma’lum shaxs transport vositasini olib qochish maqsadida Dang‘ara tumani Toshkent ko‘chasidagi avtomashinalarni ta’mirlash ustaxonasi yoniga kelgan. U yerdagi 43 yoshli R.R.ga tegishli eski Mercedes-Benz avtomashinani eshiklari qulflanmagan, ochiq holda, qarovsiz qoldirilganidan, atrofda hech kim yo‘qligidan foydalanib, olib qochgan.
Tergov-tezkor harakatlari natijasida ushbu jinoyat O‘zbekiston tumanida yashovchi 33 yoshli K.A. tomonidan sodir etilgani aniqlangan. Mashina tumanning Yangiobod ko‘chasidan topilgan va ashyoviy dalil tariqasida rasmiylashtirib olingan.
Holat yuzasidan K.A.ga nisbatan Jinoyat kodeksining 267-moddasi 1-qismi (transport vositasini olib qochish) bilan qo‘zg‘atilgan jinoyat ishi bo‘yicha ushbu modda bilan ayb e’lon qilinib, qamoqqa olish tarzidagi ehtiyot chorasi qo‘llangan.
Hozirda tergov harakatlari davom ettirilmoqda.
Izoh (0)