«Инсоннинг жони — Аллоҳнинг омонати». Ҳомиджон домла Ишматбеков фуқароларни ўз жонига қасд қилишдан қайтарди

Ўзбекистон Мусулмонлари идораси раисининг биринчи ўринбосари Ҳомиджон домла Ишматбеков сўнгги кунларда ўз жонига қасд қилиш билан боғлиқ ҳолатлар кўпайгани муносабати билан фуқароларга мурожаат билан чиқди.

Инсон умри, унинг ҳаёти Аллоҳ таоло ато этган улуғ неъматлардан бири ҳисобланади. Инсон мана шу умрни Аллоҳнинг амрига мувофиқ ўтказмоқлиги, барча неъматларга шукрона келтириб яшамоқлиги, жумладан, Аллоҳ берган умрни дунё ва охиратга манфаатли амаллар билан ўтказмоқлиги динимиз кўрсатмаси ҳисобланади.

Албатта, бу ҳаётда инсон турли-туман ҳолатларни бошидан ўтказади. Яхшилик ҳам бор, ёмонлик ҳам бор, хурсандчилик ҳам бор, мусибат ҳам бор. Бу Аллоҳнинг илоҳий ҳикмати. Инсонни бу дунёга имтиҳон учун яратди. Унинг бошига синовлар солишини ҳам олдиндан маълум қилиб қўйди.

Лекин ҳақиқий мўмин инсон мана шу имтиҳонларнинг ҳаммасини Аллоҳдан деб билса, эътиқодни маҳкам туца, ҳидоят йўлидаги, Аллоҳнинг мағфиратига сазовор банда бўлади.

Аллоҳ сабр қилишга буюрган. Бу синовлардан фақат Аллоҳга суяниб, сабр билан ўтиш керак. Ким сабр қилса, мусибатларни Аллоҳдан деб билиб, фақат ундангина сўраса, Аллоҳ ана шу банда билан бўлади: «Аллоҳ таоло сабр қилувчилар билан биргадир».

Энди баъзи бир эътиқоди суст инсонлар дунёвий мусибатларни кўтара олмаганидан, сабр қилолмаганидан ёки Аллоҳ таолони яхши танимагани, барчаси ундан эканини англамаганидан мана шу мусибатлардан қутулиш чораси ўлароқ ўз жонига қасд қилади. Аллоҳ таоло ҳаром қилган энг оғир кабира гуноҳларидан бири — инсон ўз жонига қасд қилмоқлиги.

Аллоҳ таоло шундай дейди: «Кимки ўз жонига қасд қилса, мен унга жаннатни ҳаром қилдим». Демак бизни охиратда аламли азобда қолишимиз, жаннатдан маҳрум бўлишимиз мана шу гуноҳ сабабли бўлади.

Инсон тафаккур қилиши керак. Аввало тақдир, яхшилик ҳам, ёмонлик ҳам Аллоҳдан деган иймонимизнинг ажралмас қисми борки, биз унутмаслигимиз керак. Аллоҳ кимгадир мусибатни гуноҳларга каффорат бўлиши учун, сабр қилганида мукофотлаш учун юборади.

Динимиз инсонни азиз-у мукаррам қилганидек, унинг жонини ҳам омонат қилган, — дейди Ҳомиджон домла Ишматбеков