Rossiya oldinga siljishga urinmoqda, Ukraina qo‘shinlarida yo‘qotish katta. NYT Baxmut yaqinidagi shiddatli janglar haqida maqola e’lon qildi

Donetsk xalq respublukasi hududidagi Artyomovsk yaqinida (Baxmut) shiddatli janglar davom etmoqda, buning oqibatida Rossiya va Ukraina katta yo‘qotishlarga uchramoqda, deb xabar berdi The New York Times shifokorlar, askarlar, mahalliy aholi va AQSH harbiy amaldorlariga tayanib.

“So‘nggi bir necha kun ichida rossiyaliklar jadalroq oldinga siljishga urindi”, — dedi gospitaldagi ukrainalik shifokorlardan biri Parus. “Guruh-guruh yaradorlar kela boshladi — o‘n, o‘n, besh, o‘n”.

Rossiyalik safarbar qilinganlar “oddiy vintovka (soyli miltiq) ko‘tarib olib, xuddi sovet davri askarlaridek harakatlanmoqda”, — dedi Ulibka ismli yana bir ukrainalik shifokor. “Biri o‘lsa, ikkinchisi uning o‘rnini egallaydi”.

Kunlik yaradorlar soni 240 kishiga ham yetgan, deb yozadi The New York Times.

Baxmutdagi Ukraina qo‘shinlari — “turli xil bo‘linmalardan”, jumladan, 93-mexanizatsiyalashgan brigada va 58-moto piyoda brigadasidan terilgan bo‘lib, ular Rossiyaning uzluksiz hujumlaridan tinkasi qurigan. Jurnalistlarning yozishicha, so‘nggi kunlarda Ukraina Artyomovsk yaqiniga qo‘shimcha kuchlar yubormoqda, ular orasida hududiy mudofaa uchun yetarlicha tayyorgarlikdan o‘tmagan jangchilar bor.

Ayni paytda Baxmut yaqinidagi Rossiya qo‘shinlari yanada og‘ir ahvolda, deb yozadi The New York Times ukrainalik askarlarga tayanib. Harbiy xizmatchilarning so‘zlariga ko‘ra, Rossiya Qurolli kuchlarining ochiq hujumlari doimiy artilleriya va pulemyotlardan o‘t ochish bilan qaytarilmoqda.

Ruslar Artyomovsk yaqinida “Vagner” xususiy kompaniyasi yollanma jangchilarini joylashtirishda davom etmoqda. Ammo hozir ularni Xerson frontidan chekingan kuchlar ham qo‘llab-quvvatlamoqda, dedi ukrainalik askarlar va AQSH Mudofaa vazirligi matbuot kotibi.

“Rossiya harbiylari o‘sish ko‘rsatish uchun haligacha noreal siyosiy talablar bilan shug‘ullanmoqda. Ammo mavjud kuchlarning sifati pastligi va artilleriya o‘q-dorilarining tugab borayotganini inobatga olsak, ular muvaffaqiyat qozonishi dargumon”,—  deydi Maykl Kofman, Virjiniya shtatining Arlington shahridagi tadqiqot instituti C.N.A Rossiya bo‘yicha tadqiqotlar direktori.

Shu bilan birga, Baxmut Kiyev uchun resurslarni so‘rib oluvchi “qora tuynuk”ga aylanishi mumkin, bu esa qo‘shinlarni Ukrainaning boshqa ustuvor yo‘nalishlaridan, jumladan, kelajakdagi hujum operatsiyalaridan chalg‘itadi, deyiladi NYT materialida.