Ukraina G‘arb yordamisiz bir necha hafta ichida blekautda qolishi mumkin, dedi Avstriya Mudofaa vazirligi harbiy strategi, polkovnik Markus Raysner ZDF nashriga bergan intervyusida.
“Agar kuchli havo mudofaasi o‘rnatilmasa, Ukraina bir necha hafta ichida butunlay zulmatda qoladi”, — dedi Raysner.
Uning so‘zlariga ko‘ra, Kiyev infratuzilmaga qilinadigan hujumlarga dosh berolmaydi, chunki dastlabki bosqichda Rossiya harbiylari Ukraina havo hujumidan mudofaa tizimining uchdan bir qismini yo‘q qilgan.
“G‘arb esa ayni paytda Moskvaning imkoniyatlarini yetarlicha baholamadi”, — deya qo‘shimcha qildi vazirlik rasmiysi.
Polkovnikning ta’kidlashicha, Ukraina maydonining kattaligi va himoya qilinishi kerak bo‘lgan obyektlarning ko‘pligi tufayli “bu borada biror nima qilish” deyarli imkonsiz.
“Yevropa o‘zida borini yig‘ib, Ukrainaga jo‘natmoqda. Biz ortda qolyapmiz, Rossiya esa yana tashabbusni qo‘liga olmoqda. Bu paradoksal holat”, — ta’kidladi Raysner.
Rossiya Qurolli kuchlari 10-oktabrdan buyon Ukraina infratuzilmasiga yirik zarbalar bermoqda.
Ukraina hukumati ma’lumotlariga ko‘ra, 15-noyabr kuni Rossiya mamlakat energetika tizimiga urush boshidan buyon eng kuchli zarbani bergan. O‘qqa tutishlar fonida Ukrainada elektr energiyasi vaqti-vaqti bilan o‘chirib qo‘yilmoqda.
Bunday hujumlarning so‘nggisi 23-noyabrda sodir bo‘ldi. Zelenskiyning aytishicha, Rossiya 67 ta raketa uchirgan, oqibatda Kiyev, Odessa va Chernigov viloyatlari elektrdan uzilib qolgan.
Rossiya prezidenti matbuot kotibi Dmitriy Peskov Ukrainaning ko‘plab hududlarida chiroq va issiqlik yo‘qligini muzokaralardan bosh tortayotgan Kiyev hukumati xatti-harakatlari oqibati deb atadi.
Izoh (0)