Россия олдинга силжишга уринмоқда, Украина қўшинларида йўқотиш катта. NYT Бахмут яқинидаги шиддатли жанглар ҳақида мақола эълон қилди

Донецк халқ республукаси ҳудудидаги Артёмовск яқинида (Бахмут) шиддатли жанглар давом этмоқда, бунинг оқибатида Россия ва Украина катта йўқотишларга учрамоқда, деб хабар берди The New York Times шифокорлар, аскарлар, маҳаллий аҳоли ва АҚШ ҳарбий амалдорларига таяниб.

«Сўнгги бир неча кун ичида россияликлар жадалроқ олдинга силжишга уринди», — деди госпиталдаги украиналик шифокорлардан бири Парус. «Гуруҳ-гуруҳ ярадорлар кела бошлади — ўн, ўн, беш, ўн».

Россиялик сафарбар қилинганлар «оддий винтовка (сойли милтиқ) кўтариб олиб, худди совет даври аскарларидек ҳаракатланмоқда», — деди Улибка исмли яна бир украиналик шифокор. «Бири ўлса, иккинчиси унинг ўрнини эгаллайди».

Кунлик ярадорлар сони 240 кишига ҳам етган, деб ёзади The New York Times.

Бахмутдаги Украина қўшинлари — «турли хил бўлинмалардан», жумладан, 93-механизациялашган бригада ва 58-мото пиёда бригадасидан терилган бўлиб, улар Россиянинг узлуксиз ҳужумларидан тинкаси қуриган. Журналистларнинг ёзишича, сўнгги кунларда Украина Артёмовск яқинига қўшимча кучлар юбормоқда, улар орасида ҳудудий мудофаа учун етарлича тайёргарликдан ўтмаган жангчилар бор.

Айни пайтда Бахмут яқинидаги Россия қўшинлари янада оғир аҳволда, деб ёзади The New York Times украиналик аскарларга таяниб. Ҳарбий хизматчиларнинг сўзларига кўра, Россия Қуролли кучларининг очиқ ҳужумлари доимий артиллерия ва пулемётлардан ўт очиш билан қайтарилмоқда.

Руслар Артёмовск яқинида «Вагнер» хусусий компанияси ёлланма жангчиларини жойлаштиришда давом этмоқда. Аммо ҳозир уларни Херсон фронтидан чекинган кучлар ҳам қўллаб-қувватламоқда, деди украиналик аскарлар ва АҚШ Мудофаа вазирлиги матбуот котиби.

«Россия ҳарбийлари ўсиш кўрсатиш учун ҳалигача нореал сиёсий талаблар билан шуғулланмоқда. Аммо мавжуд кучларнинг сифати пастлиги ва артиллерия ўқ-дориларининг тугаб бораётганини инобатга олсак, улар муваффақият қозониши даргумон»,—  дейди Майкл Кофман, Виржиния штатининг Арлингтон шаҳридаги тадқиқот институти C.N.А Россия бўйича тадқиқотлар директори.

Шу билан бирга, Бахмут Киев учун ресурсларни сўриб олувчи «қора туйнук»га айланиши мумкин, бу эса қўшинларни Украинанинг бошқа устувор йўналишларидан, жумладан, келажакдаги ҳужум операцияларидан чалғитади, дейилади NYT материалида.