Qirg‘iziston mamlakat mudofaasini mustahkamlash uchun Turkiyadan hujumchi dronlar sotib oldi

Qirg‘iziston mamlakat Qurolli kuchlari uchun Turkiyadan bir qancha hujumchi dronlar, jumladan Aksungur va Bayraktar sotib oldi, deb ma’lum qildi respublika prezidenti Sadir Japarov.

“Xavfsizligimizga tahdid solgan so‘nggi voqealar bizni mudofaa qobiliyati haqida o‘ylashga majbur qildi, davr mamlakat mudofaa qobiliyatini mustahkamlashni talab qilmoqda. Qisqa vaqt ichida mamlakat Qurolli kuchlari uchun “Tigr” zirhli texnikasi, Bayraktar TB2, Bayraktar Akinci va Aksungur uchuvchisiz uchoqlari xarid qilindi”, — dedi Japarov Bishkekda bo‘lib o‘tgan birinchi Xalq Qurultoyi (Xalq Assambleyasi) syezdida.

Qirg‘iziston prezidentining so‘zlariga ko‘ra, mamlakat rasmiylari qo‘shni davlatlar bilan chegara muammolarini hal qilish masalasiga duch kelmoqda.

“Chegaradagi mojarolarning sababi chegara masalasining hal etilmagani. Hozir oldimizda turgan asosiy vazifa — keyingi avlodlarga qoldirmasdan, bu masalani qo‘shnilarimiz bilan hal qilib olish”, — dedi Japarov.

Shu bilan birga, u Qirg‘iziston chegaradagi kelishmovchiliklarni tinch yo‘l bilan hal etishni talab qilishda davom etishini ta’kidladi. “Chegara masalasini ikki yo‘l bilan hal qilish mumkin – tinch, hududlar almashinuvi yo‘li bilan yoki urush va bosqinchilik yo‘li bilan”, — qo‘shimcha qildi u.

Turkiyaning Bayraktar TB2 hujumchi droni Qirg‘iziston Milliy xavfsizlik davlat qo‘mitasi (GNKB) chegara xizmatiga birinchi marta 2021-yil dekabr oyida olib kelingan. 31-mart kuni mamlakatning Issiqko‘l viloyatida dronlardan foydalangan holda harbiy mashg‘ulotlar o‘tkazilgan. 13-sentabr kuni Qirg‘iziston prezidenti Sadir Japarov GNKB Chegara xizmatining dron bazasini ochdi.

Qirg‘iziston KXSHTga a’zo davlatlardan birinchi bo‘lib turk Bayraktar’larini sotib oldi.

12-oktabr kuni Qirg‘iziston Milliy xavfsizlik davlat qo‘mitasi raisi Qamchibek Tashiyev ijtimoiy tarmoqdagi sahifasida respublika Turkiyadan Bayraktar Akinci hujumchi dronlarini sotib olganini ma’lum qildi. U dron yonida tushgan suratini ilova qildi.

Aksungur razvedka va zarba beruvchi vosita sifatida ishlatiladi, shuningdek, dengiz patrullari uchun ham mo‘ljallangan. Dron Turk Havacilik va Uzay Sanayii tomonidan ishlab chiqariladi.