Машина рулига ўтирган инсон борки, йўл-патруль хизмати ходимлари билан мулоқот қилишига тўғри келади. Албатта, бу яхши. ЙПХ ходимлари сабаб, қанчадан-қанча кўнгилсиз ҳодисаларнинг олди олинади. Санъат вакиллари ҳам баъзида ЙПХ ходимлари билан зиддиятга боради ва қоидабузарликлари учун жаримага тортилади. Қуйида ана шундай санъаткорлар ҳақида сўз юритилади.
Ҳалима Иброҳимова: «Топганинг ўлигингга буюрсин»
Комик актриса Ҳалима Иброҳимова камдан-кам ҳолларда автомобиль бошқаради. Бу вазифани кўп ҳолларда турмуш ўртоғи бажаради. Аммо йўл қоидасини бузиш билан боғлиқ ҳолатлар унда ҳам бўлиб туради. Масалан, ўтган йили актриса Malibu автомобилида йўл чизиғини босганини видеога олиб, ИИБ га жўнатган инсонлардан ранжигани ҳақидаги видеони Instagram саҳифасига жойлаганди.
Дурдона Қурбонова жонли эфирда ‘қўлга тушди’
Актриса Дурдона Қурбонова ўз қилмишини ошкор қиладиган ҳайдовчилардан бири. У шу йилнинг 22 август куни автомобилни бошқариб, Instagram’га видео жойлаган. У суратга олиш майдончасига шошилиб турган вақти машина бошқара туриб рулда пардоз қилиши ҳақида гапирган ва бу орқали йўл қоидаларига амал қилмаслигини сездириб қўйган. Тошкент шаҳар ИИББ ЙҲХБ ходимлари ҳолат юзасидан суриштирув ишларини олиб боришган. Актриса йўлдаги қоидабузарлиги учун тегишли тартибда жазоланган.
Осмон Наврўзов 30 миллион жаримага тортилди
Қорақалпоғистонлик хонанда Осмон Наврўзов тезликни ошириш ва жарима тўлаш бўйича ҳамиша пешқадам. У йил бошидан буён 30 миллиондан зиёдроқ жарима тўлаганлиги ҳақида айтиб ўтди.
— Қорақалпоғистон ва Хоразмдаги ЙПХ ходимлари машинам рақамини яхши билишади. Баъзан тўйга шошилаётганда тезликни оширишга мажбур бўламиз. Жарималарни вақтида тўлаганим учун бироз чегирма қилиб беришган. Йўқса, 50 миллиондан ортиқроқ жарима тўлашим керак эди. Уйимизда «қора хат» келаверганидан кейин дадам машинамга антирадар ўрнатиб берган. Шунда ҳам «қора хат»лар камайгани йўқ, — дейди хонанда Осмон Наврўзов.
Фарруҳ Раимов: « ‘Қора хат’ кам келади»
Хонанда Фарруҳ Раимов тартибли ҳайдовчилардан бири ҳисобланади. У асосан беглиланган йўл чизиқларини босгани учун жарима тўлагани ҳақида маълумот берди.— Шукрки, уйимизга «қора хат»лар камдан-кам ҳолларда келади. Яқин орада қачон келганини ҳам эслолмайман. Машина бошқаришни эрта бошлаганим учун ёмон ҳайдовчи эмасман, — дейди Фарруҳ Раимов.
Каниза ЙПХ ходимига бўйсунмади
Ҳамиша шоу-шувлар гирдобидаги хонанда Каниза ҳам йўл-патруль хизмати ходимлари билан зиддиятга борган. Хонанданинг ЙПХ ходими билан кечган тортишуви ҳам ижтимоий тармоқларга кўплаб баҳс-мунозараларга сабаб бўлганди. Яъни хонанда машинасига тортилган тонировканинг фойдаланиш муддати ўтиб кетганлиги учун жаримага тортилганди.
Ундан кейин эса хонанданинг ходимга бўйсунмагани учун ходим томонидан ҳужжатлари олиб қўйилган видео ҳам тарқалганди. Хонанда эса унга туҳмат қилишаётгани ҳақида айтиб ўтганди.
Дониёр Қаюмовга блогер экани фойда бермади
Инстаблогер Дониёр Қаюмов машина ойнасини ноқонуний тарзда қорайтиргани учун жаримага тортилган. У йўл-патруль хизмати ходимларига блогер экани ва видеоларида бу соҳа вакилларига ён босиши ҳақида тушунтириб, жаримани енгиллатмоқчи бўлган. Аммо видео сўнггида кўриш мумкинки, унинг машинаси жарима майдончасига олиб борилган.
Жаноб Расул: «Вилоят йўллари талабга жавоб бермайди»
ЙПХ ходимлари билан тез-тез зиддиятли вазиятларга борадиган хонанда Жаноб Расулнинг видеоси ҳам ижтимоий тармоқларда кўплаб баҳс-мунозараларга сабаб бўлганди.
— Бу соҳа вакилларига нисбатан ҳеч қандай хусуматим йўқ. Видеода айтиб ўтганимдек, мен ҳам ҳамма қатори фуқароман ва қилган ишим учун жавоб бераман. Фақат баъзида алам қиладигани вилоят йўллари талабга жавоб бермайди ва йўл-патруль хизмати ходимлари қоидага амал қилишни талаб қилишади. Йўл чизиқлари тегишли тартибда чизилмаган бўлса ҳайдовчини айблаш ҳам нотўғри, — дейди хонанда Жаноб Расул.
Умид Ҳайдаров: «Халқдан узр сўрадим»
«Миллион» жамоасининг собиқ аъзоси Умид Ҳайдаровни ҳам тартибли ҳайдовчи деб бўлмайди. Уни машина рулидаги видеоси ҳам кўплаб баҳс-мунозаларга сабаб бўлган.
— Бу ҳақда ҳеч қаерда изоҳ берганим йўқ. Элнинг оғзига элак тутиб бўлмайди. Ҳар хил гап сўзлар бўляпти. Ким ҳақ, ким эса ноҳақлиги бўйича тегишли ташкилотлар шуғулланишяпти. Видеони тарқатган инсоннинг устидан ҳеч қаерга шикоят қилганим йўқ. У оила билан эса судда муросага келамиз.Ўша воқеада қилган хатти-ҳаракатим учун эса халқдан узр сўрадим. Одамлардан илтимосим шуки, кўзингиз билан кўрмаган нарсага изоҳ қолдиришдан тийилиш керак. Бўлмаса бу ғийбат бўлиб қолади. Танганинг икки томони бўлганидек, тарқатилган видеони кўриб, бир томонлама хулоса қилиш ярамайди.
Жасур Умиров: «3800 АҚШ доллари жарима келган»
Хонанда Жасур Умиров бир пайтлар светафор нима эканлигини билмагани ва йўл қоидаларига бўйсунмагани учун 3800 АҚШ доллари миқдорида жаримага тортилгани ҳақида айтиб ўтди.
— У пайтлари бир кунда 12 тагача тўйларга борардик. Бундай пайтда шошмасликнинг иложи йўқ эди. Ҳайдовчи машинани «учирарди». «Мен-ку, тўйдан 500 АҚШ доллари оламан, сен 50 минг сўм учун ўлиб кетмоқчимисан?» деб ҳазиллашардим. У пайтлари светафор нима эканлигини билмасдик, тезлигимиз ҳам катта бўларди. Бир марта 3800 АҚШ доллари миқдорида жарима келган. Ҳозир тўйлар у қадар кўп эмас. Битта мен эмас. Бошқалар ҳам қоидаларга амал қиладиган бўлиб қолишган, — дейди хонанда Жасур Умиров.
Мавзуга доир:
- Ирқчи, зўравон ва қоидабузар: Голливудда номақбул ишлари учун қора рўйхатга киритилган юлдузлар (фото)
- Тан соқчисининг пичоқланишидан тортиб тегажоғликкача: тўйларда ўзбекистонлик хонандалар дуч келадиган аянчли ва кулгили ҳолатлар
- Мухлисни силтаб ташлаган Шоҳжаҳон Жўраев, томошабинга тарсаки туширган Алишер Узоқов: Санъаткорларни қандай ҳолатлар асабийлашишга мажбур қилади? (видео)
Изоҳ (0)